Keń baıtaq qazaq dalasyna qonys aýdarǵan túrli etnostyń mıllıondaǵan ókili qonaqjaı qazaq halqyna rızashylyǵyn bildirýdi dástúrge aınaldyrdy. Osy oraıda Qonaev qalalyq kópsalaly aýrýhanasynyń sáýleli zertteý bólimshesiniń laboranty Nıkolaı Nedovodeevpen az-kem tildesken edik. Memlekettik tildi erkin meńgergen jas maman Otany men ortasyna zor alǵysyn jetkizdi.
– Nıkolaı Sergeevıch, sóz basyn týǵan jer, ósken ortańyzdan bastasańyz. Medısınaǵa júrek qalaýyńyzben keldińiz be?
– Aýyl – qazaqtyń altyn tamyry, ultymyzdyń uıtqysy ǵoı. Sondyqtan ózim týyp-ósken mekenim Ońtústik Qazaqstan oblysy Shaqpaq baba aýylyn maqtan etemin. Kıeli mekende 14 jasyma deıin ata-anammen turdym. Dostarym Aıan jáne Rashıd úsheýmiz aýyldyń shańyna aýnap-qýnap, aýyr jumysqa ábden ysylyp, mal baǵyp, shóp shaýyp, kókpar tartyp óstik. Aýylymyzda barlyǵy qazaq tilinde sóıleıtin edi. Sondyqtan otbasymyzben Qonaev qalasyna qonys aýdarǵanymyzda orys tilin meńgerip, erkin sóıleý qıynǵa soqty. Sebebi orys bolsam da, júregim «qazaq» dep soqqan azamatpyn. Mektepten soń medısınalyq kolledjge túsip, oqýymdy oıdaǵydaı aıaqtaǵanyma da bes jyl tolyp qalypty. Mamandyǵymdy adaspaı tańdaǵanyma kúnde qýanamyn. Medısına salasynda eńbek etetinimdi kishkentaı kezimnen-aq biletinmin. О́ıtkeni dáriger, medbıkelerdi kórgenimde júregim erekshe sezimde bolatyn.
– Eńbek etetin bólimsheńizdiń jumys jaıyn tarqata ketseńiz.
– Bólimsheniń quramyna rentgenodıagnostıkalyq kabınet, flıýorografııalyq kabınet, rentgendik kompıýterlik tomografııa kabıneti, magnıtti-rezonansty tomografııa kabıneti kiredi. Bólimshede jumys isteıtin dárigerler jaqyn jáne alys shet elderdegi iri respýblıkalyq ortalyqtarda oqyǵan. Bólim jetekshi álemdik óndirýshilerdiń dıagnostıkalyq jabdyqtarynyń tolyq jıyntyǵymen jabdyqtalǵan. Jalpy, kez kelgen emdeý úderisiniń sapasy eń aldymen senimdi jáne tolyq dıagnozǵa baılanysty ǵoı. Sondyqtan men jumys isteıtin bólimshede dıagnozǵa erekshe jaýapkershilikpen qaraıdy. Sáýlelik dıagnostıkanyń joǵary bilikti dárigerleri men zamanaýı rentgenodıagnostıkalyq apparatýranyń barlyq spektri – durys dıagnoz qoıýdaǵy tabystyń kepili. Sáýlelik dıagnostıka – bul medısınadaǵy derbes bólim, ol sáýlelenýdiń ártúrli túrlerin qoldaný negizinde dıagnostıkalyq maqsattarǵa keskin alýdyń ártúrli ádisterin biriktiredi.
– Qazirgi ortańyzda qandaı etnos ókilderimen aralasyp turasyz?
– Ujymymyz óte úlken. Munda tatar, ózbek, uıǵyr, káris, ýkraın, basqa da etnos ókilderimen bir otbasynyń balalaryndaı eńbek etemiz. Bir-birimizge baǵyt berip, qamqor bolý, súringenge súıenish, jylaǵanǵa jubanysh bolýdy basty paryzymyz sanaımyz. Mundaı asyl qasıet pen keń peıil darqan dalamyzdan, qazaqy qasıetten boıymyzǵa darydy.
Keıingi ýaqytta qazaqsha sóıleıtin etnos ókilderiniń aıtarlyqtaı kóbeıgenin basty jetistigimiz dep bilemin. Qazaqsha ózim ǵana emes, úıdegi ata-anam, baýyrym, jubaıym Nastıa, qyzym Emılııa da sóıleıdi. Memlekettik til – ana tilimiz tárizdi, árqashan qurmetteımiz. Qabyldaýyma kelgen pasıentterdiń qalaýyna qaraı eki tilde erkin tildesemin.
Naýryz – yrys-yntymaǵymyz artyp, ortaq taǵdyr toǵystyrǵan halqymyz bir-birine shynaıy alǵys sezimi men rızashylyǵyn bildiretin aıtýly aı ekeni sózsiz. Ult pen ulys arasyndaǵy ózara qurmet pen syılastyq bizdi jańa bıikter men belesterge bastaı beretinine senimim mol. Múmkindikti paıdalana otyryp, týǵan elime, jerlesterime, ózim eńbek etip júrgen aýrýhananyń dırektory Aıman Ǵalymjanqyzyna, áriptesterime, ata-anama, jaqyndaryma erekshe alǵysymdy bildiremin!
Almaty oblysy,
Qonaev qalasy