Almaty oblysy Talǵar qalasyndaǵy A.Kıvılev atyndaǵy sport kesheninde ustazdar arasynda asyq atý men bes asyqtan respýblıkalyq týrnır ótti. Atalǵan dúbirli dodaǵa Almaty qalasy men Almaty, Jambyl, Jetisý , Túrkistan oblystarynan jınalǵan ustazdar qatysyp, ózara saıysqa tústi.
Týrnırdi Talǵar aýdandyq dene shynyqtyrý jáne sportty damytý ortalyǵynyń dırektory, «Sport juldyzdary» respýblıkalyq jýrnalynyń shef-redaktory, Qurmetti sport qyzmetkeri Jandos Busyrmanov quttyqtaý sózimen ashyp, qatysýshylarǵa sáttilik tiledi. Asa tartysty ótken aqtyq synda asyq atýdan 20-29 jas aralyǵynda Túrkistan oblysy Ordabasy aýdanynan kelgen Aqnıet Qaldybekov, 30-39 jas aralyǵynda Jambyl oblysy Shý aýdanynyń muǵalimi Bahtııar Ahmetov, 40-49 jas aralyǵynda Esik qalasynan qatysýshy Daryn Tashkenbaev, 50-59 jas aralyǵynda Túrkistan oblysy Keles aýdanynyń muǵalimi Qýandyq Nalıev jeńistiń bıik tuǵyrynan kórindi.
Bes asyqtan ótken saıysta Talǵar qalasynyń ókili Raıhan Tursynbaeva qarsylasynan basym túsip, jeńimpaz atansa, almatylyq Gúljamal Asaýbaeva ekinshi orynǵa ıe boldy. Al qola júldeni Almaty oblysynyń oıynshylary Shaınur Ilgıdaeva men Maqpal Saǵatbekova enshiledi.
Jeńimpaz jáne júldeger atanǵan asyqshylarǵa Asyq atý federasııasynyń dıplomdary men medaldar tabys etildi.
Naýryz merekesi qarsańynda Jambyl aýdanynda da asyq atý men bes asyqtan jasóspirimder arasynda tartysty jarys uıymdastyryldy. Bul básekede baq synasqan osy aýdandaǵy «Jasulan» balalar úıiniń oıynshylary bárinen ozyp, bas júldeni jeńip aldy. Jalpykomandalyq jarysta Jambyl men Talǵar aýdandary 2 jáne 3-oryndardy ıelendi.
Bes asyqtan ótken básekede Qarasaı aýdanynyń qyzdary qarsylastarynan oq boıy ozyp, I orynǵa turaqtady. Júldeli II, III oryndy Talǵar men Eńbekshiqazaq aýdanynyń oıynshylary utyp aldy.
Almaty oblysy