Úkimet Memleket basshysy Ulttyq quryltaıdyń tórtinshi otyrysy barysynda alǵa qoıǵan О́skemendegi Gematologııa ortalyǵyn jedeldetip paıdalanýǵa berý týraly tapsyrmasyn júzege asyrý úshin Arnaýly memlekettik qordan 33,6 mlrd teńge bóldi, dep habarlaıdy Egemen.kz.
Medısına mekemesinde 148 oryndyq stasıonar jáne klınıka naýqastaryna arnalǵan 24 oryndyq qonaq úı syndy eki korpýs qarastyrylǵan.
Bas ǵımaratta zamanaýı medısınalyq qural-jabdyqtarmen qamtylǵan zerthanalar, sáýlelik dıagnostıka, kardıologııa, kardıohırýrgııa, gematologııa, súıek kemigin transplantasııalaý jáne kúrdeli somatıka bólimsheleri ornalastyrylady. Jańa ortalyq naýqastardy emdeý men ońaltýdyń ozyq ádisterin paıdalanýǵa múmkindik beredi.
Jobanyń jalpy quny – 71,3 mlrd teńge. Búginde nysannyń 78%-y aıaqtalǵan. Ǵımarattyń qańqasy turǵyzylyp, syrtqy ınjenerlik jeliler tartylǵan. Sondaı-aq, shatyr, qasbeti, tereze bloktary daıyndalyp, ishki árleý jumystary ishinara aıaqtalǵan. Úkimet densaýlyq saqtaý júıesindegi ınfraqurylymdy damytýǵa erekshe kóńil bólip keledi. 2024 jyldyń qorytyndysy boıynsha «Aýylda densaýlyq saqtaýdy jańǵyrtý» ulttyq jobasy aıasynda 361 alǵashqy medısınalyq-sanıtarııalyq kómek kórsetý nysanynyń qurylysy aıaqtaldy. Bul óz kezeginde shalǵaı jáne aýyldyq eldi mekender turǵyndaryna medısınalyq qyzmet kórsetýdiń qoljetimdiligin arttyrýǵa múmkindik berdi. Búginde Úkimet áleýmettik mańyzy bar nysandar qurylysyna Arnaýly memlekettik qordan qarajat bóldi. Olardyń qatarynda 7 mektep, onyń ishinde bir mýzyka mektebi, 2 sport kesheni, stadıon, kópsalaly aýrýhana kesheni, oblystyq jedel járdem stansasy, Arnaýly áleýmettik qyzmetter kórsetý ortalyǵy, jataqhana, 2 balabaqsha bar. Budan bólek, qarajat Qyzylorda oblysynyń Aral aýdanyndaǵy sýmen jabdyqtaý júıelerin salý jáne jańǵyrtýǵa baǵyttalǵan.