Qyzyrly Qyzyljardaǵy Naýryz meıramy basqa da oblystardaǵydaı 14 naýryzdaǵy Kórisý kúnin ataýdan bastalǵan. Bıylǵy kóktem de óz sánimen bastalyp, kúnniń qyzýy da kóńildi kóterip turdy. Keı jyldary bolatyn kóktemgi yzǵyryq ta bıyl bolmaı, aýa temperatýrasy túnniń ózinde nólden joǵary bolyp tur.
Barlyq mekeme-uıymdar men oqý oryndarynda ulttyq kıim kıgen jandar ózderiniń áriptesterine baryp, bir-birimen kórisip, qystan aman shyqqan qýanyshtaryn birlesip atap ótti. Al qalanyń mádenıet úıinde «Teriskeı» folklorlyq-etnografııalyq ansambli óner kórsetip, qala jurtshylyǵyna konsert qoıdy.
Shańyraq kúnin birneshe óner ujymy kóptegen alańda konserttik baǵdarlamalarymen atap ótti. Sonyń ishinde Partızan kóshesindegi 12, Sh.Ýálıhanov kóshesindegi 32,34,36 kópqabatty úılerdiń aldyndaǵy konsertter turǵyndardy qýanyshqa bóledi. Munda qazaq ánderimen qatar basqa etnostardyń da ónerleri halyqqa pash etildi. Ár etnos ónerpazdary ulttyq kıimderin kıip, án shyrqap, bı bıledi. Ásirese Qap taýynyń ókilderi satyr-sutyr etken bılerimen kórermenderdiń delebesin qozdyrdy.
Ulttyq kıim kúni oblystyq mýzeıde belgili etnodızaıner Tilek Sultannyń «Kıeli kımeshek» kórmesi boldy. Kımeshek – qazaq jurtshylyǵy qurmetteıtin áıelderdiń baskıimi. Ol ananyń ardaqty esimimen baılanysty qasıetti uǵym. Elimizdiń aımaqtarynda kımeshektiń ár túri bolady, biraq onyń qasıeti men qadiri barlyq ólkede birdeı. Osy kúndi S.Sháımerdenov atyndaǵy qazaq klassıkalyq gımnazııasynyń oqýshylary da aıryqsha atap ótti. Bul ujym oblystyq bilim basqarmasy bastaǵan chellendjge qatysyp, qazaqtyń rýhy men dilin sıpattaıtyn ulttyq kıimderimizdi jarnamalaýǵa belsene qatysty.
Tımırıazev aýdany Stepnoı aýylynyń turǵyndary Jańarý kúnin atap ótti. Oblys ákimi Ǵ.Nurmuhambetov aýyl turǵyndarymen birge osy kúndi qarsy alyp, mektep oqýshylarynyń ónerlerin tamashalady. Sonymen qatar ol tasqynǵa daıyndyq pen aýdandyq aýrýhananyń kúrdeli jóndeý jumystaryn tekserdi.
Ulttyq sport kúniniń sheńberinde Qyzyljar aýdanynyń ortalyǵy Beskól aýylynda qazaqsha kúresten jarys ótti. Qazaq kúresinen jattyqtyrýshy bolyp júrgen Beıbit Sádýaqasovtyń aıtýyna qaraǵanda, aýdanda sporttyń osy túri qaryshtap damyp keledi eken. «Bizdiń shákirtimiz Ádilet Myrzash Azııa kýboginiń qola júldegeri, al Muhamet Mustahym degen shákirtimiz el chempıonatynyń kúmis júldegeri boldy», dedi ol. Jarysqa 12-13 jáne 15-16 jastaǵy jasóspirimder qatysyp, úlken sport saraıynyń ishin qyzyqty dýmanǵa bóledi.
Yntymaq kúni Naýryz meıramynyń resmı túrde ashylý saltanaty boldy. Kún jarqyrap, turǵyndardyń bárin qalanyń bas alańyna shaqyrǵandaı, jınalǵan halyqtan ıne shanshar bos jer joq. Bir jaqta býy burqyraǵan Naýryz kóje, basqa da tamaqtar pisirilip jatyr. Úlken sahnany aınaldyra bıylǵy mereıtoı ıeleri Smaǵul Sádýaqasulyna, Sábıt Muqanovqa, Ebineı Bóketovke, t.b. jeke-jeke ataýly kıiz úıler tigilipti. Olarǵa kirgen adamdar arystar týraly aqparattar alady. Mysaly, oblystyq S.Muqanov atyndaǵy kitaphana tikken Sábeńniń kıiz úıine Almatydan jazýshynyń nemeresi de kelgen eken. Al úıdiń ishindegi barlyq eksponat pen jazýshynyń ómiri men shyǵarmashylyǵy týraly aqparatty kitaphanashy Qaıyrjan Qazıqyzy kirgenderge aıtyp berip turdy.
Kelesi kúnderi Naýryz meıramy jalǵasyn tabady. Ol bıyl Qyzyljarǵa aıryqsha jyly kúndermen keldi.
Petropavl