Búgin Astanadaǵy Ortalyq kommýnıkasııalar qyzmetinde Qazaqstan Respýblıkasynyń Týrızm jáne sport mınıstriniń orynbasary Serik Jarasbaevtyń qatysýymen brıfıng ótti, dep jazady Egemen.kz.
Brıfıngte S. Jarasbaev dene shynyqtyrý jáne sport salasyn reformalaýdyń negizgi tetikterin baıandady. Onyń aıtýynsha, sportshylardy daıarlaýdyń tıimdi, ashyq jáne nátıjege baǵdarlanǵan júıesin qalyptastyrý, buqaralyq sportty damytý, sondaı-aq sporttyq ınfraqurylymdy jańǵyrtý basym baǵyttar bolyp qala beredi.
Mınıstrlik «dene shynyqtyrý jáne sport týraly» Zań jobasyn ázirledi. Ol 2025 jyldyń 29 qańtarynda Májiliste ekinshi oqylymda maquldanyp, Senattyń qaraýyna jiberildi.
Qujatqa «Múgedektigi bar sportshyny súıemeldeýshi» uǵymy engiziledi.
Bul jańa ereje birinshi top múgedektigi bar sportshylarǵa sporttyq is-sharalarǵa qatysý kezinde kómek kórsetýge múmkindik beredi. Zań jobasy múgedektigi bar sportshylardyń qozǵalys erkindigin jáne sporttyq jarystarǵa qatysý sharttaryn ulǵaıtýǵa baǵyttalǵan.
Bul ózgeris sporttaǵy ınklıýzıvtilikti arttyryp, múgedektigi bar azamattardyń sportqa qatysýyna qolaıly jaǵdaı jasaýǵa septigin tıgizedi.
Zań jobasynda taǵy da bir mańyzdy ózgeristiń biri legıonerlerdi memlekettik bıýdjet jáne kvazımemlekettik sektor sýbektileriniń qarajaty esebinen qarjylandyrýǵa tyıym salynǵany.
Bul shara el azamattarynyń sportta da, qarjylyq qoldaýda da basymdyqqa ıe bolýyn qamtamasyz etedi.
Zań jobasynyń qabyldanýy elimizdegi sporttyq júıeni jetildirýge, memlekettik qarajattyń tıimdi paıdalanylýyna jáne sporttyń kásibı deńgeıde damýyna serpin beredi.