Bul týraly búgin Prezıdent janyndaǵy Ortalyq kommýnıkasııalar qyzmeti alańynda ótken brıfıngte Týrızm jáne sport mınıstriniń orynbasary Serik Jarasbaev aıtty, dep habarlaıdy Egemen.kz.
Brıfıng Prezıdenttiń 2024 jylǵy 2 qyrkúıektegi Qazaqstan halqyna Joldaýynda aıtylǵan tapsyrmalaryn iske asyrý jónindegi júıeli jumystyń jalǵasy bolyp tabylady. Memleket basshysy sport salasyndaǵy zańnamany jańartý qajettiligin, sondaı-aq chempıondardyń jańa býynyn tárbıeleý úshin jaǵdaı jasaýǵa nazar aýdarý kerektigin atap ótken bolatyn.
Memleket basshysynyń tapsyrmasy boıynsha sport salasynda keshendi reformalardy júzege asyrý bastaldy. Mınıstrlik «dene shynyqtyrý jáne sport týraly» Zań jobasyn ázirledi. Ol 2025 jyldyń 29 qańtarynda Májiliste ekinshi oqylymda maquldanyp, Senattyń qaraýyna jiberildi.
Sport federasııalarynyń jumystary bir júıege keltiriledi
S.Jarasbaevtyń aıtýyna súıensek, qazirgi ýaqytta elimizdegi jergilikti, óńirlik jáne respýblıkalyq sport federasııalary jeke sýbektiler retinde áreket etedi jáne bir-birine baǵynbaıdy. Bul jaǵdaı sportty damytýdaǵy táýelsiz saıasat júrgizýge, múddeler qaqtyǵysyna jáne jaýapkershiliktiń bulyńǵyrlyǵyna ákep soǵyp jatyr, nátıjesinde sporttyń damýy baıaýlap otyr.
«Usynylyp otyrǵan jańa model jergilikti federasııalardyń akkredıttelgen respýblıkalyq (nemese óńirlik) sport federasııalaryna baǵynyshty bolýyn kózdeıdi. Bul ózgeris sportty damytý salasyndaǵy basqarýdy ortalyqtandyrýdy, tıimdilikti arttyrýdy jáne jaýapkershilikti aıqyndaýdy maqsat etedi», dedi Spıker.
Sport rezervin daıarlaý máselelerine aıtarlyqtaı ózgerister engiziledi
Spıkerdiń aıtýynsha Zań jobasyna sáıkes, sport rezervi tek joǵary jetistikter sportynyń túrleri boıynsha daıarlanatyn bolady. Sportshylardy daıarlaý ýákiletti organ bekitetin sporttyq daıarlyqtyń ulttyq standarttaryna sáıkes qatań túrde júrgizilip, ulttyq quramanyń áleýetin arttyrý jáne sport salasyndaǵy júıeli damý úshin negiz bolmaq.
«Sonymen qatar, kásibı sportty memlekettik bıýdjet qarajaty esebinen qarjylandyrýǵa qatysty jańa erejeler usynylady. Zań jobasy boıynsha, kásibı klýbtardy ustaýǵa memleket tarapynan qarjylandyrý lımıtteri belgilenetin bolady. Bul shara bıýdjettik shyǵystardyń tıimdiligin arttyryp, sportty damytýǵa bólingen qarajattyń durys paıdalanylýyn qamtamasyz etedi», dedi Serik Jarasbaev.