Sý tasqyny kezeńine daıyndyq sheńberinde gıdrotehnıkalyq qurylystardy jóndeý boıynsha 13 óńirde 43 is-shara iske asyryldy, dep habarlaıdy Egemen.kz.
Naqty ataǵanda, Aqmola, Aqtóbe, Atyraý, Shyǵys Qazaqstan, Jambyl, Batys Qazaqstan, Qaraǵandy, Qostanaı, Qyzylorda, Soltústik Qazaqstan, Túrkistan, Abaı, Jetisý oblystarynda jumystar júrgizildi.
«Josparǵa gıdrotehnıkalyq qurylystardy aǵymdaǵy jóndeý, kanaldardy tazartý, jaǵalaý nyǵaıtý jumystary kirdi. Mysaly, Aqmola oblysynda Shaǵalaly jáne Sileti sý qoımalary, sondaı-aq «Alva» lımandyq sýarý júıesi jóndeýden ótti. Abaı oblysynda Shar sý qoımasynyń qorǵanys bógeti salyndy. Soltústik Qazaqstan oblysynda Sergeev gıdrotorabynda jaǵalaý nyǵaıtý jumystary jasaldy», dedi Sý resýrstary jáne ırrıgasııa vıse-mınıstri Erbolat Ibraıhanov.