Iordanııanyń Amman qalasynda kúres túrlerinen Azııa chempıonaty ótip jatyr. Qurlyq dodasyn aldymen grek-rım kúresiniń sheberleri bastap, 10 salmaq dárejesinde medaldardy bólisti. О́kinishke qaraı, elimizden barǵan balýandarǵa Azııa chempıonatynyń altyny buıyrmady.
«Klassıkter» 2019 jyly Úndistanda ótken qurlyq birinshiliginen de altyn júldesiz qaıtyp edi. Byltyr Bishkek kileminde 1 altyn, 2 kúmis, 1 qola oljalaǵan-dy.
Omar Sataev (82 kg) eresekter arasynda Azııa chempıonatyna alǵash ret qatysyp, kúmis medaldi mise tutty. Fınaldyq beldesýde Iran balýany Muhammed Ázız Naghaýsıge ese jiberdi. Muhammed byltyr 23 jasqa deıingiler arasynda ótken álem chempıonatynda top jardy. Jasóspirim shaǵynda da Azııa chempıonatynda dara shyqqan sańlaq. Tájirıbeli balýan jerlesimizden 3:1 esebimen basym tústi. Omar shırek fınalda Ońtústik Koreıa, jartylaı fınaldyq beldesýde Japonııa balýanyn jyqty.
Enshimizge ekinshi kúmis medaldi 130 kg salmaqta beldesken Álimhan Syzdyqov saldy. Byltyr Parıj Olımpıadasynyń shırek fınalyna jetip toqtaǵan Álimhan da Azııa chempıonatynyń altyny jolynda Iran balýanyna ese jiberdi. Farıd Shaban Hedaıatı jerlesimizdi aıqyn basymdyqpen jeńdi. Álimhan 2021 jyly Almatyda ótken Azııa chempıonatynda kúmis júldeger, 2022 jyly Mońǵolııada ótken qurlyq dodasynda chempıon atandy, 2023 jyly Astana tórinde ótken birinshilikte qola medal enshiledi.
Grek-rım kúresinen Azııa chempıonatynyń qola medalin Ibragım Magomadov (77 kg) pen Shámil Ojaev (87 kg) ıelendi. Qalǵan alty salmaq dárejesinde synǵa túsken balýandar júldeden tys qaldy. Byltyrǵy Olımpıadadan keıin grek-rım kúresinen ulttyq quramanyń bas bapkeri Iýrıı Melnıchenko qyzmetinen ketti. Bas bapker laýazymyna eshkim taǵaıyndalǵan joq. Iordanııaǵa balýandardy aǵa bapker Nurym Dúısenov bastap bardy.
О́zbekstan balýandary grek-rım kúresinen 3 altyn, 2 kúmis, 1 qola medal oljalady. О́zbekstandyq qandasymyz Aıtjan Qalmahanov 63 kg salmaq dárejesinde jeńiske jetti.