Memleket basshysynyń Almatydaǵy rezıdensııasynda Qazaqstan men О́zbekstan prezıdentteriniń beıresmı kezdesýi ótti, dep habarlaıdy Egemen.kz.
Qasym-Jomart Toqaev mártebeli meımannyń Almatyǵa saparmen kelgenine rızashylyq bildirip, mundaı beıresmı kezdesýler jaqsy dástúrge aınalǵanyn aıtty.
– Bul – baýyrlas, dostas memleketter arasyndaǵy yntymaqtastyqty damytý maqsatynda atqarylyp jatqan jumysty iskerlik sıpatta taǵy bir talqylaýǵa oraıly sát. Biz – odaqtas eldermiz. Eki el arasyndaǵy yqpaldastyq tutas Ortalyq Azııa óńirindegi jaǵdaıǵa tikeleı áser etedi, – dedi Qazaqstan Prezıdenti.
Memleket basshysy baýyrlas halyqtardy jaqyndastyrýǵa, aımaqtyń ornyqty jáne qaýipsiz damýyndaǵy ortaq maqsattardy ilgeriletýge Shavkat Mırzııoevtiń zor úles qosqanyn atap ótti.
– Qazaqstandyqtar Sizdi jaqsy tanıdy jáne asa qurmetteıdi. Sizdiń myqty ári abyroıly kóshbasshylyǵyńyzdyń arqasynda О́zbekstan qarqyndy damyp keledi. О́tken jyly ózbek ekonomıkasynyń ósimi 6 paıyzdan asqanyn bilemiz. Ekonomıkanyń barlyq sektoryndaǵy maqsatty kórsetkishter josparǵa saı atqarylyp jatyr. О́zbekstan neǵurlym tabysty damyǵan saıyn, bizdiń elderimiz arasyndaǵy saýda-ekonomıkalyq yntymaqtastyq ta soǵurlym sapaly bolady. Sondyqtan búgingi kezdesýde naqty máseleler boıynsha pikir almasamyz dep oılaımyn, – dedi Qasym-Jomart Toqaev.
О́z kezeginde О́zbekstan Prezıdenti ekijaqty baılanystardy nyǵaıtýdy kózdeıtin búgingi kezdesýdiń mańyzyna toqtaldy.
– Meni ózińizdiń týǵan jerińiz, atap aıtqanda, Almaty qalasynda dostyq peıilmen, eki halyqtyń dástúrine saı iltıpatpen qarsy alyp jatqanyńyzǵa raqmet. О́zimniń jáne halqymnyń atynan rızashylyǵymdy bildiremin. Sońǵy jyldary qarym-qatynasymyz múldem jańa deńgeıge kóterildi. Biz – odaqtaspyz. О́zara syılastyǵymyzdyń arqasynda kóptegen másele sheshimin taýyp keledi, ekeýara ýaǵdalastyqtardyń barlyǵy iske asyrylyp jatyr. Naqty nátıjeler bar. Sizdi Qazaqstannyń zor tabystarǵa jetýimen quttyqtaımyn. Ekonomıkalaryńyz damyp keledi, jetistikterińiz joǵary. Birinshi toqsandy 5,4 paıyzben qorytyndylap otyrsyzdar. Búgingi kezdesýimizdiń sıpaty resmı bolmasa da, men úlken qurammen keldim. Degenmen árbir osyndaı beıresmı júzdesýler bizdiń baılanystarymyzǵa, barlyq kelisimderimizdiń oryndalýyna tyń serpin beredi, – dedi Shavkat Mırzııoev.
Taraptar saıası, saýda-ekonomıkalyq, kólik-logıstıkalyq, ınvestısııalyq, energetıkalyq, sý sharýashylyǵy, ónerkásip kooperasııasy jáne týrızm salalaryndaǵy ózara yqpaldastyqtyń perspektıvasyn jan-jaqty talqylady. Mádenı-gýmanıtarlyq baılanystardy damytýǵa erekshe nazar aýdaryldy.
Sonymen qatar óńirlik jáne halyqaralyq kún tártibiniń ózekti máseleleri qarastyryldy.
Kezdesý sońynda prezıdentter qazaq-ózbek strategııalyq seriktestigin odan ári tereńdetýge beıil ekenin rastady.