Kopengagendegi Korol baǵynda eren ertegishi Gans Hrıstıan Andersenniń ejelgi eskertkishi tur. Olaı deıtin sebebimiz tas músin Andersenniń kózi tirisinde salynǵan. Alaıda eskertkishtiń alǵashqy nusqasy onyń kóńilinen múlde shyqpaǵan. Jobanyń syzbasynda qalamgerdiń tizesine otyryp ertegi tyńdaǵan bala beınelengen kórinedi.
Bul týraly Andersen 4 maýsym kúni kúndeligine mynadaı jazba qaldyrady: «Keshqurym músinshi Sobıý keldi. Men oǵan eskertkishtiń unamaǵanyn jetkizdim. Biraq ol meni túsinbedi. Basqalar da solaı. Meniń ertegilerim balalarǵa emes, negizinen eresekterge arnalǵan. Balalar ertegini ústirt oqyp shyǵady, al sanasy jetilgen jandar onyń maǵynasyna tereńdep enedi».
Ras... Oralhansha oraǵytsaq, nege biz osy er jetkennen keıin ertegi oqýdy jalǵastyrmaımyz?
Munyń sebebi ǵajaıypqa senbeýden shyǵar deımin. Dúnıeni túgilimen rasıonaldy turǵyda qabyldaý – kóńil qusyn torǵa qamap tastaýmen birdeı qylmys.
Jaýǵa jalǵyz shapqan Alpamystyń erligi nege múmkin emesteı kórinedi? Bári de múmkin. Er Tóstikke ǵaıyptan taıyp Taýsoǵar, Jelaıaq, Kóltaýysar nege kelmesin? Keledi. Burynǵy qazaq dúnıeni osylaı qabyldaǵan. Qudaıdyń kez kelgen qysyltaıańnan alyp shyǵatynyna ımandaı sengen. Sol arqyly olardyń boıynda erlik te, órlik te boldy.
Abaı aıtady: «Aqylǵa syımas ol Alla» dep. Endeshe qudaıǵa ılanǵan halyq bolsaq, bizge dál osy baıyrǵy senimdi qaıta jańǵyrtý kerek.
Asylynda, otbasyǵa qamqorlyq, Otanǵa janqııarlyq mahabbat osydan kelip shyǵady.