Beıbitshilik jáne kelisim saraıynda, Mádenıet jáne aqparat mınıstrliginiń uıymdastyrýymen «Ulttyq qundylyqtar: salttyń syrly beınesi» atty respýblıkalyq shyǵarmashylyq baıqaýynyń jeńimpazdaryn saltanatty marapattaý rásimi ótti, dep habarlaıdy Egemen.kz.
Is-sharanyń negizgi maqsaty – beıneleý óneri arqyly ulttyq qundylyqtar men mádenı nysandardy nasıhattaý, sondaı-aq otandyq sýretshilerdiń shyǵarmashylyǵyn qoldaý jáne patrıottyq rýh pen ulttyq biregeılikti qalyptastyrý.
Baıqaýǵa Qazaqstan óńirlerinen 137 kásibı sýretshi qatysty. Olar qazaqtyń mádenı qundylyqtaryn sheber beınelep, óz eńbekterin peızaj, natıýrmort jáne sıýjetti kartına janrlarynda usyndy.
Baıqaý qorytyndysyna sáıkes qazaqtyń salt-dástúrleri men ádet-ǵuryptaryna erekshe kórkemdik kózqaras beınelengen úzdik jumystar tańdaldy. Bul týyndylar zamanaýı kórkemdik tehnıkalar men dástúrli motıvterdi úılestirip, ulttyq murany jańasha paıymdaıdy.
Mádenıet jáne aqparat vıse-mınıstri Aıbek Sydyqov barlyq qatysýshylar men qonaqtarǵa alǵys bildirip, ulttyq bolmysty óner arqyly saqtap, nasıhattaýdyń mańyzyn atap ótti. Ol mundaı bastamalar sýretshilerdiń shyǵarmashylyǵyn jańa deńgeıge kóterýge, qoǵamǵa eldiń baı mádenı murasyn tereńnen tanytýǵa múmkindik beretinin aıtty.
«Bul baıqaý – sýretshilerdiń sheberligin tanytatyn óner dodasy ǵana emes, eń aldymen ulttyq ónerdiń kókjıegin keńeıtetin mańyzdy qadam.
Osyndaı bastamalar arqyly biz tól mádenıetimizdi zaman talabyna saı jańǵyrtyp, sýretshilerge qoldaý kórsetip, olardyń shyǵarmashylyǵyn jańa deńgeıge kóterýge múmkindik beremiz.
Baıqaýǵa qatysqan barlyq sýretshilerge halqymyzdyń baı mádenıetin, salt-dástúrin, babalar amanatyn óner tilimen órnektep, el rýhanııatyn baıytýǵa qosqan zor úlesteri úshin erekshe alǵys bildiremiz», dedi vıse-mınıstr.
Sonymen baıqaý jeńimpazdary kelesi júldeli oryndarǵa ıe boldy:Gran-prı – Oralbek Qabóke «О́mir esigi»;I oryn – Qamı Aıtqalıev «As»;II oryn – Úmit Jubanysheva «7 kúlshe»;III oryn – Áset Jaqypbek «Aq kúıme».
Baıqaý aıasynda qazaq halqynyń ulttyq qundylyqtaryn jan-jaqty kórsetetin kórme ashyldy. Qonaqtar qazaq halqynyń dástúrleri, turmysy men fılosofııasynyń zamanaýı kórinisin tamashalaı alady. Kórme eki aı boıy jumys isteıdi.