Atyraý qalasynyń prokýratýrasy jyl basynan beri 200-den astam balanyń quqyǵyn qorǵady. Jergilikti atqarýshy organdar men polısııanyń 24 qyzmetkeri tártiptik jaýapqa tartyldy, dep habarlaıdy Egemen.kz.
«Polısııa qyzmetkerleri kámelet jasyna tolmaǵandarǵa qatysty qorǵaýshynyń qatysýynsyz ákimshilik hattamalar toltyrǵan. Prokýratýranyń narazylyǵymen osyndaı 197 hattamanyń kúshi joıyldy. Úıden oqıtyn múgedek balalarǵa járdemaqy tólenbegeni, zańmen belgilengen normalarǵa sáıkes jetim balalardy memlekettik turǵyn úı qorynan beriletin úı kezegine qoımaǵany týraly derekter anyqtaldy», dep habarlady oblystyq prokýratýradan.
Prokýrorlyq qadaǵalaý aktileri negizinde 3 jetim bala turǵyn úı alý kezegine turǵyzyldy. Al úıden bilim alatyn 7 múgedek balalarǵa járdemaqy tólendi.
«Osylaısha prokýratýranyń aralasýymen jetim jáne múgedek balalardyń konstıtýsııalyq quqyǵy qorǵaldy. Prokýratýra qyzmetkerleri teris mazmundy jáne óz-ózine qol jumsaýdy, esirtki quraldaryn nasıhattaıtyn 85-ten astam ınternet-saıtty, chattar men áleýmettik jelidegi paraqshalardy buǵattady», -dep málimdedi prokýratýradan.