Qosshy qalasyndaǵy kreatıvti habta qolónershiler bas qosyp, atalǵan saladaǵy túıtkildi máselelerdi talqylady. Sheberlerdiń talap-tilekterin tyńdaýǵa Mádenıet jáne aqparat, Saýda jáne ıntegrasııa vıse-mınıstrleri men depýtattar bardy. Aıta keteıik, qazirgi tańda kreatıvti óndiriske qatysty zań jobasy Májiliste qaralyp jatyr. Keleli keńestegi aıtylǵan usynys-pikirler jańa qujatqa engizilmek.
Kreatıvti óndiris salasynda qolónershilik basym baǵyttardyń biri sanalyp, jalpy kreatıvti naryqtyń úshten birin quraıdy. Búginde elimizde, shamamen 46 myń qolónershilik sýbektisi tirkelgen. Negizinen qolóner ortalyqtary eldiń ońtústiginde – Túrkistan, Taraz, Shymkent qalalarynda shoǵyrlanǵan. Jýyrda Túrkistanǵa «Qolónershiler qalasy» mártebesi berildi. «Arnaıy mártebe týraly» zańǵa sáıkes jergilikti bıýdjet esebinen qolónershilerdiń shyǵyndaryn 10-25% kóleminde óteý júıesi qarastyrylǵan.
Kezdesý barysynda Mádenıet jáne aqparat vıse-mınıstri Evgenıı Kochetov kreatıvti óndiristi qoldaýdyń ekinshi paketi ázirlenip jatqanyn atap ótti. Onyń ishinde qolónershilerdi qoldaý quraldary da bar.
«Bul óte aýqymdy zań. Búgin osy salanyń mamandaryn shaqyryp, oı-pikirleri men usynystaryn tyńdap otyrmyz. Aıtylǵan ár máseleniń jany bar. Bári qaǵazǵa tizilip, zań jobasy aıasynda qaralatyn bolady», dedi Májilis depýtaty Nurgúl Taý.
Jıyn barysynda qolónershilerge kórme alańdaryn usyný jáne olardyń ónimderin kommersııalandyrý máseleleri de talqylandy.
Aıta ketsek, bıyl kreatıvti óndiristi qoldaý jáne damytý týraly zań qabyldandy.
Sondaı-aq jańa Bıýdjet kodeksine sáıkes biryńǵaı lotereıa operatory túsiminiń 3%-y toqsan saıyn kreatıvti ındýstrııalardy damytýǵa qoldaý kórsetý qorynyń esebine aýdarylyp otyrady. Bul qor 2025 jyldyń shilde aıynan bastap jumys isteı bastaıdy.
Kezdesý barysynda Májilis depýtaty Amanjol Áltaı elimizde Qolónershiler kúnin belgileýdi jáne «Halyq sheberi» ulttyq syılyǵyn taǵaıyndaýdy usyndy. Bul másele Májilistiń Áleýmettik-mádenı damý komıtetiniń otyrysynda qaralatyn bolady.