Áleýmettik qyzmetker – qoǵamnyń janashyry

Jahandaný, ekono­mıka­lyq daǵdarystar, eko­logııalyq apat, kó­shi-qon, halyqtyń qartaıýy sııaq­ty kúrdeli qubylystardyń aıa­synda memleket pen qoǵam tarapy­nan áleýmettik qoldaý men kómekti qajet etetin adamdar sany ulǵaıyp keledi. Osyǵan baı­lanysty áleýmettik jumys sala­syndaǵy arnaýly mekemeler men qyzmetkerlerdiń kómegine júginýshilerdiń artatyny belgili. Áleýmettik qorǵaý júıesi qýatty áleýmettik baǵdarlanǵan salaǵa aınalyp kele jatqanyn elimizde 110 myń adamnyń memlekettik áleýmettik tapsyryspen jumys isteıtin 1021 uıymnan arnaýly qyzmet alatyndyǵynan da baıqaýǵa bolady. Olardyń jumy­sy neǵurlym ádil, qoldaýshy qoǵam qurýǵa arnalǵan.

Keıde qarapaıym adamı qa­rym-qatynastyń ózi – qamkóńil jan­dardyń kóńiline demeý. Halyq­tyń álsiz sanattaryna qoldaý men kómek keń aýqymdy qyzmetti qamtıdy. Kóptegen azamatqa materıaldyq qoldaý alý asa mańyz­­­dy. Áleýmettik qyzmetker olar­­dyń quqyn qorǵaýǵa, jár­dema­qyny rásimdeýge, ýaqyt­sha baspana izdeýge, azyq-túlik pen kıim-keshek jetkizýge kómek­tesedi. Olar sondaı-aq kúıze­liste júrgen adamdarǵa keńes berip, emosıonaldyq alańdaý­shylyqtardy eńserýge, psıholo­gııalyq densaýlyqty qalpyna keltirýge qoldaý kórsetedi, azamat­tar­dyń jumysqa ornalasýyna, jańa daǵdylardy úırenýine, qoǵam­­ǵa beıimdelýine uıytqy bolady.

Áleýmettik kodekste mundaı mamannyń kásibı qyzmetin júzege asyrý kezindegi quqy men mindetine, mártebesi men jumys erekshelikterine, kásibı qupııa, minez-qulyq ádebine, qyzmetti oryndaýǵa baılanysty shekteý­lerge, áleýmettik kepildikter týraly túsinikterine jeke taraý ar­nalǵan. Qoǵam damýyndaǵy jańa úderisterdi eskere otyryp, áleý­mettik qyzmetkerlerdiń kásibı daıyndyq deńgeıine, daǵdylary men quzyretterine basa mán berilip otyr.

Bıyldan bastap menshik nysa­nyna qaramastan erekshe qa­jet­tilikteri bar adamdarǵa arnaý­ly áleýmettik qyzmetter kórse­tetin sýbektilerdi lısenzııa­laý engizildi. Sondaı-aq iske qosyl­ǵan jan basyna shaqqandaǵy qarjy­landyrý júıesi derbes qajet­tilikterdi eskere otyryp, áleýmet­tik kómek pen qoldaýdyń qajetti kólemin aıqyndaýǵa múmkindik beredi. Muqtaj adamdar arnaýly taýarlar men qyzmetterdi, qyz­met kórsetý uıymdarymen qosa áleýmettik qyzmetkerdi tańdaı alady. Osy maqsatta júıeleý, esepke alýmen aınalysatyn Áleý­mettik qyzmetkerlerdiń arnaıy tizilimi qalyptastyryldy. Onda qyzmetkerdiń biliktiligi, kórsetetin qyzmetterdiń túri men sapasy, jumys nátıjeleri týraly aqparat qamtylǵan. Áleýmettik qyzmetkerdiń biliktilik deńgeıi­ne qatysty bilim modýlderi ázirlendi. Segiz deńgeı boıynsha kásiptik standarttar bekitilip, jumys berýshilerdiń daıarlanatyn kadrlardyń bilim dárejesine, daǵdylary men iskerlikterine qoıylatyn talaptary belgilen­di. Sondaı-aq Ulttyq ǵylymı ortalyqtyń bazasynda arnaýly áleýmettik qyzmet kórsetý salasynda kásibı biliktilikti taný ortalyǵy quryldy.

Qyzmetterdi onlaın rejiminde usynýdyń, áleýmettik máselelerdi taldaý, tıimdi áleýmettik baǵdar­la­malardy ázirleýde úlken derek­terdi paıdalanýdyń jańa múmkin­dikteri paıda boldy. Áleýmettik problemalardyń kúrdelenýine, jańa tehnologııalardyń damýy­na baılanysty sala qyzmet­kerleriniń bilimine, kásibı quzyretine, jeke qasıetterine qoıylatyn talaptar udaıy ósip otyrady.

Ulttyq qyzmetter jikteýshiniń jobasyna tórt mamandyq: áleýmet­tik kómekshi, arnaıy áleýmettik qyzmet kórsetetin uıymdardaǵy áleýmet­tik qyzmetkerdiń kómekshi­si, áleýmettik qyzmetker-keıs-menedjer, áleýmettik jumys mened­jeri alǵash engizilip otyr. Kásiptik standartta: halyq­ty áleý­mettik qorǵaý salasynda sıfrlyq mobıldi qosymsha­lar­dy qol­da­nýǵa, kommýnıkasııa qurýǵa beıimdilik, múmkindigi shekteýli azamattardyń, olardyń otbasyla­ry­nyń áleýetin baǵalaý, kópsala­ly topta qadaǵalaý toptaryn uıymdastyra bilý, advokattyq qyzmet, áleýmettik sala klıent­teriniń múmkindikterin keńeıtý sekildi mindetterdi oryndaýdyń birqatar jańa tásilderi qarasty­rylǵan.

Áleýmettik jumysqa bilikti­­likti baǵalaýdyń táýelsiz­ júıesinen ótken sertıfıkattalǵan mamandar ǵana jiberiletin bolady. Kodekste kózdelgendeı, qyzmetkerdiń qoǵam­daǵy mártebesin arttyrý oqytý men sertıfıkattaýdy, sondaı-aq olardyń kásibı deńgeıin eskere otyryp, eńbekaqy tóleýdiń jańa júıesin engizýdi quraıdy. Qazirde 12 704 áleýmettik qyzmetkerdiń 9 568-i oqytylyp, 7 537-si sertıfıkat aldy. 2021–2023 jyldar ara­lyǵynda Arnaýly qyz­met kórse­tý ortalyqtarynda jumys isteıtin áleýmettik sala qyz­metkerleriniń jumys jaǵdaıy men mártebesin arttyrý maqsatynda eńbekaqyny kóterý kezeń-kezeń­men júrgizilip, nátıjesinde eki ese ósti. Bul rette kórsetiletin qyz­metterdiń bi­li­k­tilik deń­geıin, sanaty men ereksheligin eskere­tin eńbek­aqy tóleýdiń jańa júıesi qolda­nylady. Áleýmettik ju­mys­ty damytýǵa baǵyttalǵan bul shara­lardyń barlyǵy túpki nátıjede árbir adam óz áleýetin iske asyryp, laıyqty ómir súrýge múmkindik alatyn ádil de ınklıýzıvti qoǵam qurýǵa yqpal etpek.