Premer-mınıstrdiń orynbasary – Syrtqy ister mınıstri Murat Nurtileý elimizge jumys saparymen kelgen Eýropalyq odaqtyń Ortalyq Azııa jónindegi Arnaıy ókili Edýards Stıpraısty qabyldady.
Kezdesý barysynda taraptar Qazaqstan men Eýropalyq odaq arasyndaǵy Keńeıtilgen seriktestik pen yntymaqtastyq týraly kelisimdi iske asyrý, ekonomıkalyq baılanystardy nyǵaıtý, ınvestısııalyq ózara is-qımyl jáne óńirlik qaýipsizdik taqyrybyn qosa alǵanda, ekijaqty jáne óńirlik yntymaqtastyqtyń keń aýqymdy máselelerin talqylady.
Taraptar Ortalyq Azııaǵa arnalǵan EO strategııasy aıasynda dıalogti jalǵastyrýdyń jáne ornyqty damý, sıfrlandyrý men klımattyq kún tártibi salasyndaǵy birlesken bastamalardy iske asyrýdyń mańyzdylyǵyn atap ótti. Jasyl transformasııa jáne óńirdiń Eýropalyq odaqpen kólik-logıstıkalyq baılanystylyǵy máselelerine erekshe nazar aýdaryldy. Osy turǵyda Transkaspıı halyqaralyq kólik dálizin damytýǵa baǵyttalǵan jobalardy iske asyrýdyń ózektiligi basa aıtyldy.
Qazaqstan syrtqy saıası vedomstvosynyń basshysy Eýroodaqpen seriktestikti tereńdetýge beıildiligin rastaı otyryp, osy aptada Samarqandta ótetin «Ortalyq Azııa – Eýropalyq odaq» sammıtiniń mańyzyna nazar aýdardy.
О́z kezeginde E.Stıpraıs Qazaqstan men EO arasyndaǵy ózara is-qımyldyń qarqyndy damýyn joǵary baǵalap, óńiraralyq yntymaqtastyqty damytýda, mańyzdy ınfraqurylymdyq ári ekonomıkalyq jobalardy iske asyrýda elimizdiń jetekshi rólin atap ótti.
Kezdesý qorytyndysy boıynsha taraptar ekijaqty jáne óńirlik kún tártibindegi barlyq ózekti másele boıynsha syndarly dıalogti jalǵastyrýǵa ýaǵdalasty.
Elimizdiń negizgi saýda jáne ınvestısııalyq seriktesi bolyp otyrǵan Qazaqstan men Eýropalyq odaq arasyndaǵy qarym-qatynas óziniń tıimdiligin kórsetip keledi. О́tken jyly Qazaqstan men EO arasyndaǵy taýar aınalymy 49,7 mlrd AQSh dollaryn qurady (+16,9%), onyń ishinde Qazaqstannyń EO-ǵa eksporty – 38,6 mlrd dollar, ımporty – 11,1 mlrd dollar.
2005 jyldan 2024 jylǵy 9 aıǵa deıingi kezeńde EO elderinen Qazaqstanǵa tikeleı tartylǵan ınvestısııalardyń jalpy kólemi 200,7 mlrd dollardy qurady. Bul elimizge quıylǵan barlyq tikeleı sheteldik ınvestısııalardyń (419,5 mlrd dollar) 47,8%-yn quraıdy. Byltyrǵy 9 aıda EO-dan elimizge tikeleı ınvestısııalar kólemi 6,4 mlrd dollar nemese jalpy kólemniń 50,4%-yn qurady. Qazaqstanda eýropalyq kapıtaldyń qatysýymen 3 myńnan asa kompanııa jumys istep jatyr.