Májilis depýtaty Janarbek Áshimjanov Úkimetke arnaıy depýtattyq saýal joldap, eldegi ulttyq qundylyqtarǵa qarsy áreket etetin uıymdardyń jumysyna tyıym salýdy talap etti. Depýtat LGBT nasıhatynyń keńinen taralyp, kámeletke tolmaǵan jasóspirimderge baǵyttalýy Qazaqstannyń dástúrli moraldyq qundylyqtaryna qaýip tóndiretinin málimdedi, dep jazady Egemen.kz.
Janarbek Áshimjanov óz saýalynda Memleket basshysy Qasym-Jomart Toqaevtyń Býrabaıda ótken Ulttyq quryltaıda LGBT ıdeologııasynyń kóptegen elderge kúshtep tańylyp kelgenin jáne halyqaralyq úkimettik emes uıymdardyń memleketterdiń ishki isine aralasqanyn ashyq aıtqanyn eske saldy.
«Jastardy azdyryp, otbasyn oıran etýdi kózdeıtin bul uıymdardyń jymysqy áreketteri syrttan, ıaǵnı shetelderden qarjylandyrylýda. Olar bul baǵytta jumys isteıtin úkimettik emes uıymdarǵa túrli granttar berý arqyly elimizdiń ishki isine aralasyp, ulttyq bolmysymyzǵa jat dúnıelerdi taratýda. Osylaısha, qoǵamdy ishten iritip, memleketimizge qaýip tóndirýde», dedi depýtat.
Depýtat elde belsendilik tanytyp júrgen birqatar uıymdardyń qyzmetin synǵa aldy. Ol «Femınıta» uıymynyń mektep oqýshylary arasynda LGBT-ny nasıhattap, «qalaı gomoseksýalıst, lesbııanka bolý joldaryn úıretetin» is-sharalarǵa shaqyrýlar taratqanyn málimdedi.
«Rasynda da, sońǵy jyldary áleýmettik jelilerde ulttyq qundylyqtarymyzǵa jat qubylystardy, LGBT-ny nasıhattaıtyn uıymdardyń belsendi áreketi ımanymyzdy úıirip, janymyzdy shúberekke túıýde. Ásirese, olar TikTok, ózge de platformalar arqyly óskeleń urpaqty azǵyndyqqa úgitteýde. Asa joǵary tehnologııalyq ádis-aılamen qarýlanǵan mundaı qıturqy úgit-nasıhatqa áli kámelettik jasqa tolmaǵan, jaqsy men jamandy aıyra bilmeıtin, buǵanasy bekimegen, rýhanı dińgegi qatpaǵan balalar men jasóspirimderimiz tez boı aldyratyny anyq. Bul áreket BUU-nyń Balalar quqyǵy jónindegi konvensııasyna da qaıshy keledi. Iаǵnı olar halyqaralyq normalardyń ózin belden basyp, adamdyqtan da, ardan da attaýda», dedi ol.
Depýtattyń aıtýynsha, buǵan deıin AQSh-tyń USAID (AQSh-tyń halyqaralyq damý agenttigi) qory arqyly Qazaqstanǵa bólingen qarjynyń toqtaǵanyna qaramastan, Batystan qarjylandyrylatyn uıymdar áli de jumysyn jalǵastyryp jatyr.Janarbek Áshimjanov Úkimetke birqatar naqty talaptar qoıyp, qoǵamdy ulttyq qundylyqtarǵa jat ıdeologııalardan qorǵaý úshin shuǵyl sharalar qabyldaýdy surady.
«Búkil áleýmettik jelilerdi qatań súzgiden ótkizip, kámelettik jasqa tolmaǵandar arasynda ulttyq dástúrimiz ben dúnıetanymyzǵa jat qubylystardy nasıhattaıtyn azǵyn aqparattarǵa tosqaýyl qoıý. Mádenıet jáne aqparat mınıstrliginiń LGBT qozǵalysynyń kámelettik jasqa tolmaǵandarǵa áseri týraly zertteýin aıaqtap, jarııalaý. El Prezıdentiniń tapsyrmasyna sáıkes dástúrli moraldyq qundylyqtarymyzdy nyǵaıtý jóninde arnaıy tujyrymdama ázirleý. Syrttan qarjylandyrylatyn, túrli granttar alatyn, ulttyq salt-dástúrimizdi mansuq etetin úkimettik emes uıymdardy tekserip, olardyń kámelettik jasqa tolmaǵan balalarmen jumys isteýine tosqaýyl qoıý», dedi J.Áshimjanov.
Depýtat buǵan deıin bul máseleniń Májilis minberinen birneshe ret kóterilgenin, alaıda Úkimetten naqty qoldaý tappaı kele jatqanyn aıtty.
«Byltyr bastamashyl azamattar LGBT-ǵa qarsy jarııalaǵan petısııaǵa eki aptanyń ishinde 50 myńnan astam adamnyń qoldap daýys berýi qoǵamnyń da buǵan barynsha qarsy ekenin bildiredi. Degenmen, qoǵamnyń bul oryndy talaby Mádenıet jáne aqparat mınıstrligi tarapynan ishinara ǵana qoldaý taýyp, zertteımiz degenmen ǵana shekteldi. Urpaǵyńdy azdyratyn, dástúrińdi tozdyratyn, alaýyzdyqty qozdyratyn, rýhyńdy syndyratyn, sóıtip eldigińdi tyndyratyn «demokartııalyq úrdisterdiń» atasyna nálet! Aýzymen qus tistegen alys-jaqyndaǵy elderdiń ózi etekterin qymtap, esikterine qaraýyl qoıa bastady. Al, biz kóńilimizdi kúpti qylyp, jaratylysymyzdy baıqap, sharanamyzdy shaıqap turǵan qubylystardy kózimizben kórip turyp qam-qareketsiz otyrmyz. Janymyz shyryldap, tánimiz kúıip barady», dedi ol.