Mádenıet jáne aqparat vıse-mınıstri Evgenıı Kochetovtyń Qaraǵandy oblysyna jumys sapary barysynda jergilikti kreatıvti ındýstrııa ókilderimen kezdesý ótti, dep habarlaıdy Egemen.kz.
Qaraǵandy oblysynda jalpy 2161 kreatıvti ındýstrııa sýbektisi tirkelgen. Eń keń taralǵan sala qatarynda IT-tehnologııalar, metall jáne tastan buıymdar óndirý, arhıtektýra, kıno jáne TV-prodakshn, etno-feshn baǵyty bar. Qazirgi ýaqytta óńirde kreatıvti hab qurý jumystary júrgizilip jatyr.
Kezdesý barysynda salanyń ózekti máseleleri talqylandy. Atap aıtqanda, kórme alańdaryn usyný, kreatıvti taýarlar men qyzmetterdi kommersııalandyrý jáne eksporttaý máseleleri qozǵaldy.
Evgenıı Kochetov qazirgi ýaqytta atalmysh ekonomıkalyq sektordy memlekettik qoldaýdyń ekinshi paketi qarastyrylyp jatqanyn atap ótti.
Eske sala keteıik, bıyl kreatıvti ındýstrııalardy qoldaý jáne damytý máseleleri boıynsha zań qabyldanǵan bolatyn. Sonymen qatar Bıýdjet kodeksi bekitildi. Endi ulttyq lotereıa operatory tabysynyń 3%-y toqsan saıyn Kreatıvti ındýstrııalardy damytýǵa qoldaý kórsetý jónindegi korporatıvtik qoryna bólinetin bolady. Qor osy jyldyń shilde aıynda jumysyn bastaıdy.