Qazaqstanda qolma-qol aqsha alý operasııalarynyń sany kópjyldyq mınımýmǵa deıin tómendedi. 2025 jyldyń alǵashqy eki aıynda qazaqstandyq jáne sheteldik tólem kartalarynyń paıdalanýshylary elimizde shamamen 35 mıllıon tranzaksııa jasaǵan, bul ótken jyldyń osy kezeńimen salystyrǵanda 9%-ǵa az. Bul týraly Birinshi Kredıttik Bıýro málimdedi, dep jazady Egemen.kz.
«2017 jyldan beri eń tómengi kórsetkish tirkelip otyr. Sol kezde 2017 jyldyń alǵashqy eki aıynda 33,6 mıllıon operasııa bolǵan. Sonymen qatar, kartalardyń sany qazirgi jáne 2017 jylmen salystyrǵanda aıtarlyqtaı ózgergen. 2017 jyldyń 1 naýryzynda Qazaqstandaǵy kartalar sany 16 mıllıonnan az bolǵan, al 2025 jyldyń 1 naýryzynda bul kórsetkish 81 mıllıonnan asyp otyr», delingen habarlamada.
Aıta keteıik, paıdalanylǵan kartalar sany da ósken, biraq eki kezeńdegi aıyrmashylyq birdeı. Atap aıtsaq 2017 jyly bul kórsetkish 8,3 mıllıon bolsa, 2025 jyly – 41,8 mıllıonǵa jetken.
2025 jyldyń qańtar-aqpan aılarynda qolma-qol aqsha alý operasııalarynyń jalpy somasy 3,9 trıllıon teńgege jetken. Bul nomınaldy túrde 2024 jyldyń osyndaı aılarymen salystyrǵanda 6%-ǵa kóp, biraq tutyný baǵalarynyń ósýin eskergende is júzinde azdap tómendeý baıqalǵan.
Sondaı-aq, Birinshi Kredıttik Bıýro 2025 jyldyń aqpan aıynda qolma-qol aqshasyz tranzaksııalardyń sany 13,7%-ǵa ósip, 1 mıllıard operasııaǵa jetip, al kólemi 21,4%-ǵa ulǵaıǵanyn málimdedi. 2025 jyldyń alǵashqy eki aıynda qolma-qol aqshasyz tranzaksııalardyń jalpy sany 2 mıllıardqa jýyq bolyp, bul 14%-ǵa kóp bolǵan. Olardyń somasy 25,9 trıllıon teńgeni qurap, nomınaldy túrde 23%, al ınflıasııany eskergende 12% ósken.