Ǵanı Beısembaev «Jaıly mektep» ulttyq jobasy aıasynda salynǵan mektepterdiń dırektorlary jáne pedagogterimen jumys kezdesýlerin ótkizdi, dep habarlaıdy Egemen.kz.
Ujymdardyń aldyna bilim berý sapasyn arttyrý jáne zamanaýı bilim berý ortasyn damytý boıynsha mindetter qoıyldy.
Mınıstr atap ótkendeı, jaıly mektep — bul bilim berý standarttaryn teńestirýdegi jáne mekteptegi bilim berý modelin júıeli túrde ózgertýdegi mańyzdy qadam. Ulttyq joba árbir balaǵa turǵylyqty jerine qaramastan zamanaýı talaptarǵa saı, sapaly bilim alýǵa múmkindigin qamtamasyz etýge baǵyttalǵan.
«Jaıly mektepter úzdik pedagogıkalyq tájirıbeler men ınnovasııalyq sheshimderdi taratatyn tirek bilim berý uıymdaryna aınalýy tıis. Bul baǵytta qaýipsiz orta qurýǵa, bilim berýdiń turaqty sapasyn qamtamasyz etýge qabiletti basqarý korpýsy men kadrlyq áleýetti qalyptastyrýǵa erekshe nazar aýdarylady. Osyndaı mektepter jelisi arqyly biz elimizde bilim berý sapasyn kezeń-kezeńimen arttyrý júıesin qalyptastyryp jatyrmyz», dedi mınıstr.
Pedagogter óz kezeginde oqý prosesin odan ári jetildirý boıynsha tájirıbelerimen jáne usynystarymen bólisti. Ádistemelik qoldaý, muǵalimderdiń kásibı damýy jáne ata-analardy oqý-tárbıe prosesine tartý máseleleri keńinen talqylandy.
Sondaı-aq ustazdarǵa arnalǵan semınar uıymdastyrylyp, onda jaıly mektepter tujyrymdamasy, baǵalaý jáne monıtorıng júıesiniń tetikteri, kadr resýrstaryn basqarý tásilderi, bilim berý prosesin sıfrlandyrý quraldary usynyldy.