Abaı oblysynyń Tótenshe jaǵdaılar departamenti jańa tehnıkalarmen tolyqty. Oblystyń ortalyq alańynda Qasym Qaısenov atyndaǵy №68303 áskerı bóliminiń jeke quramyna jańa arnaıy tehnıkalardyń kiltin tapsyrý rásimine kýá boldyq. Is-sharaǵa oblys ákimi Berik Ýálı, Tótenshe jaǵdaılar mınıstri Shyńǵys Árinov qatysty.
Oblys qurylǵaly beri óńirge 28 órt sóndirý tehnıkasy men 24 ınjenerli tehnıka berilgen. Bul jolǵy saltanatty jıynda qutqarý qyzmetiniń qajettilikterine arnalǵan 23 tehnıkanyń kilti júrgizýshilerge tapsyryldy. Olardyń qatarynda joǵary ótimdi júk kólikteri, arnaıy qutqarý mashınalary men «Trekol» kóligi bar.
Saltanatty rásimde sóz sóılegen oblys ákimi Berik Ýálı Tótenshe jaǵdaılar mınıstrligine alǵys bildirip, jańa tehnıkalardyń kelýi – aımaq halqynyń qaýipsizdigine jasalǵan mańyzdy qadam ekenin jetkizdi.
«Bizdiń aımaq – ormandy-dalaly, órt qaýpi joǵary óńir. Sondyqtan bul salada eńbek etip júrgen azamattarǵa artylar júk te, senim de mol. Olar antyna adal, sertine berik, eldiń amandyǵyn bárinen joǵary qoıatyn azamattar. Sol er júrek mamandarǵa da shynaıy alǵysymdy bildiremin. Sondaı-aq, oqys jaǵdaılarǵa únemi daıyn bolý maqsatynda, qajetti qaýipsizdik tehnıkalary kezeń-kezeńimen tolyqtyrý turaqty nazarda bolatynyn da basa aıtqym keledi», dedi aımaq basshysy.
Kólik kiltin tapsyrý rásiminde sóz alǵan Tótenshe jaǵdaılar mınıstri Shyńǵys Árinov jańa tehnıkanyń qutqarýshylar jumysyna úlken serpin beretinine senim bildirdi. Is-shara sońynda oblys ákimi Tótenshe jaǵdaılar mınıstrimen birge Qutqarýshylar alleıasyna shyrsha kóshetterin otyrǵyzdy.
Abaı oblysy