Mańǵystaýlyq jıhankez Rabbım Borashev «Aqtaý – Túrki áleminiń mádenı astanasy» mádenı jylynyń aıasynda túrki memleketterin velosıpedpen aralaýǵa shyqty, dep habarlaıdy Egemen.kz Mańǵystaý oblysy Qoǵamdyq kommýnıkasııa ortalyǵyna silteme jasap.
Jıhankez Qońyrat-Hıýa-Úrgenish-Samarqand-Tashkent-Túrkistan-Taraz-Bishkek-Almaty-Ashhabad qalalaryn aralap, 4 500 shaqyrymdy júrip ótpek.
«Aqtaý qalasy kúlli túrki áleminiń mádenı astanasy atanyp jatyr. Soǵan oraı, Parıjdegi saparym sekildi túrki elderiniń yntymaqtastyǵyn, birligin kórsetý maqsatynda jolǵa shyqtym. Túrki memleketteriniń birligi bekem bolǵaı, aq jol tilegen halyqqa alǵysym sheksiz!», dedi jıhankez Rabbım Borashev.
Rabbım Borashev - buǵan deıin birqatar eýropa elderin velosıpedpen aralap, myńdaǵan shaqyrymdardy artta qaldyrǵan kánigi saıahatshy.
Veloshabandozdy óńir turǵyndary teńiz jaǵalaýynda saltanatty túrde shyǵaryp saldy. Is-sharaǵa Beıneý aýdanynyń ákimi Rahymjan Shalbaev qatysyp, sátti sapar tiledi.
«Halyqaralyq is-shara aıasynda bastalǵan Rabbım Borashevtyń sapary sátti bolsyn! Oblysymyzǵa qonaq bolyp kelgen túrki elderiniń qurmettileri aǵamyzǵa qol-ushyn sozyp, kómektesip otyrsa deımiz. Aman-esen elge oralýyńyzǵa tilektespiz!», dedi Rahymjan Shalbaev.