Megapolıste «Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» qalalyq naýqany aıasynda aınalany tazartyp, turmystyq qaldyqtardy turaqty óńdeýge baǵyttalǵan kezekti joba iske qosyldy, dep habarlaıdy Egemen.kz.
Toqyma qaldyqtaryn jınap, suryptap, qaıta óńdeýdi qarastyratyn FABRIKA jobasynyń bir aıdyń ǵana ishindegi nátıjesi jaman emes. Qazirgi tańda qalada 18 arnaýly konteıner ornatylsa, aldaǵy kúnderi taǵy 22 konteıner ornatý josparlanǵan. Bolashaqta joba Almatynyń basqa aýdandaryn da qamtýy tıis.
Bastama qolǵa alynǵan kúnnen bastap 20 000 kılogramnan astam eski kıim-keshek jınalsa, endi ol suryptalyp, qala aýmaǵynda qaıta óńdeledi. Bul materıaldardan ónerkásipte qoldanylatyn qaıta óńdelgen talshyq pen maılyq shúberekteri jasalady. Sonymen qatar, jınalǵan kıimniń shamamen 13%-y qaıyrymdylyq uıymdaryna berilmek, sebebi olar áli de paıdalanýǵa jaramdy.
Ekologııalyq baǵalaýlarǵa sensek, qazirdiń ózinde jınalǵan toqyma qaldyqtaryn kádege asyrý 74 000 kılogramnan astam CO₂ ekvıvalentiniń aýaǵa taralýyna jol bermese – osy mólsherdegi kómirqyshqyl gazyn 3 730-dan astam aǵash bir jylda sińire alady eken.
Osynaý aýqymdaǵy alǵashqy bastama FABRIQA jobasy Almaty qalasynyń Ekologııa jáne qorshaǵan orta basqarmasynyń qoldaýymen júzege asyryla bastady. Joba ekologııalyq turaqty sheshimderdiń tıimdi ári áleýmettik mańyzy bar ekenin kórsetip otyr. Maqsaty – aı saıyn 120 000 kılogramǵa deıin toqyma qaldyqtaryn jınap, olardyń polıgonǵa tastalýyn azaıtý jáne qala turǵyndaryn sanaly tutyný men qaıta óńdeý mádenıetine tartý.