Bas prokýrordyń orynbasary Ǵalymjan Qoıgeldıev Sherzat Bolattyń úıiniń órtenýine qatysty tergeýdiń jańa málimetterin aıtty, dep habarlaıdy Egemen.kz.
Ǵalymjan Qoıgeldıevtiń aıtýynsha, bul is boıynsha sotqa deıingi tergeý áli jalǵasyp jatyr.
«Saraptamalar keń aýqymda júrgizildi. Bul saraptamalardyń belgili bir nátıjeleri bar (...) Biz Reseı Federasııasyna halyqaralyq tergeý buıryǵyn jiberdik», dedi Qoıgeldıev Senatta ótken brıfıngte.
Bas prokýrordyń orynbasary túsindirgendeı, istiń tolyqtyǵyn zertteý úshin tártip saqshylary órt shyqqan kúni úı mańynda qandaı kólikter turǵanyn spýtnık arqyly anyqtaǵysy keledi. Bul úshin taǵy biraz ýaqyt kerek.
Eske sala keteıik, 2024 jyly 4 qazanǵa qaraǵan túni Talǵarda bir top adam jasóspirimdi qatigezdikpen óltirip ketken edi. Belgili bolǵandaı, 16 jastaǵy Sherzat Bolat dúkende ákesine kómektesip júrgen kezde agressıvti tutynýshyǵa tap bolyp, janjal bastalǵan. Satyp alýshy dostaryna qońyraý shalyp, bir top adam bolyp Sherzatty, onyń ákesi men aǵasyn pyshaq jáne myltyqpen uryp-soǵa bastaǵan.