«Qazaqstandyq qoǵamdyq damý ınstıtýty» KeAQ basqarmasynyń tóraǵasy Nurbek Mətjanı Ortalyq kommýnıkasııalar qyzmetiniń podkastynda ChatGPT paıdalaný məselesine qatysty pikirin bildirdi, dep habarlaıdy Egemen.kz.
Onyń aıtýynsha, jasandy ıntellekti adamdardyń jumysyn jeńildetedi, biraq analıtıka, boljam jasaýǵa kelgen kezde adamdy almastyra almaıdy.
«Jalpy əlem negizi tehno-optımıster jəne tehno-pessımıster dep bólinedi. Əsirese, tehnologııaǵa kelgen kezde. Tehno-pessımıster ol əlemdi jasandy ıntellekt, tehnologııalar jaýlap alady, adamdar jumyssyz qalady, jappaı jumyssyzdyq bolady degen bir sarynda pikir bildiredi. Tehno-optımıster kerisinshe, bəri jaqsy bolady, kerisinshe bizge jańa múmkindikter ashylady, jumysymyz jeńildeıdi degen basqasha pikir bildiredi», dedi Nurbek Mətjanı.
Onyń pikirinshe, jasandy ıntellekt pen adamnyń kognıtıvti múmkindikteri, onyń paıym-parasaty qatar júrgen kezde, adamzattyń ómiri əldeqaıda jaqsara túspek.
«Bizdiń artyqshylyǵymyz – bizdiń ıntervıýerler ər óńirge barady, eki adamnyń arasynda bəribir baılanys ornaıdy. Sol turǵysynan sosıologııalyq zertteýler kezinde face to face ədisin jasandy ıntellekt almastyra almaıdy dep oılamyn», dedi ol.