Tennısten Aýstralııanyń Brısben qalasynda ótken Bıllı Djın Kıng kýboginiń irikteý saıysyn elimizdiń áıelder quramasy sátti aıaqtady. Eki kezdesýde de jeńiske jetken jerlesterimiz jarystyń negizgi bóliginde kúsh synasýǵa múmkindik beretin jalǵyz joldamany ıelendi.
Elimizdiń tennısshileri alǵashqy aınalymda Aýstralııadan 2:1 esebimen aılasyn asyrdy. Keshe Kolýmbııamen kúsh synasty. Ońtústik Amerıka qurlyǵynan kelgen oıynshylar jerlesterimizge jarytyp qarsylyq kórsete almady. Iýlııa Pýtınseva Valentına Arrıasty 6:0, 6:1 esebimen oısyrata utty. Iýlııaǵa nebári 38 mınýt jetkilikti boldy. Elena Rybakınaǵa da óz qarsylasy Iýlıana Lızarazony bar-joǵy 52 mınýtta jeńdi – 6:1, 6:2.
Sońǵy juptyq saıys ta bizdiń qyzdardyń paıdasyna sheshildi. Zarına Dıas pen Jibek Qulambaeva Peres Garsııa/Iýlıana Lızarazo jubyn úsh sette jeńdi – 6:2, 5:7, 6:4. Elimizdiń quramasy endi 16-21 qyrkúıek aralyǵynda Qytaıdyń Shenchjen qalasynda jalaýy jelbireıtin jarystyń fınaldyq bóliginde kúsh synasady.
Bıllı Djın Kıng kýbogi 1963 jyldan beri uıymdastyrylyp keledi. 2020 jylǵa deıin ol Federasııa kýbogi dep ataldy. Osy týrnırde eń mol oljaǵa AQSh quramasy keneldi. Amerıkalyqtar 18 jarysta aldyna jan salmady. Chehııanyń 11 márte mereıi ústem bolsa, Aýstralııanyń alty alamanda asyǵy alshysynan tústi. Jekelegen tennısshiler arasynan Krıs Evertke teń keler eshkim joq. HH ǵasyrdyń 70-80 jyldary jasyndaı jarqyldaǵan AQSh-tyń Florıda shtatynyń týmasy 8 týrnırde top jardy. Al Bıllı Djın Kıngtiń ózi jeti ret jeńis toıyn toılady.
Osyǵan deıin elimizdiń quramasy atalǵan jarystyń fınaldyq bólginde 2022, 2023 jyldary óner kórsetti. Biraq qadamymyz sátti bolmady. Jerlesterimiz osy joly barynsha nátıjeli oıyn órnegin kórsetip, óz jankúıerlerin qýantady degen oıdamyz.