«Taza Qazaqstan» jalpyulttyq bastamasy aıasynda 21-26 sáýir aralyǵynda elimizde aýqymdy is-sharalar ótedi.
Taqyryptyq apta Astanada eriktilerdiń, belsendilerdiń, startaperlerdiń, iri ónerkásiptik kásiporyndardyń qatysýymen «Taza Qazaqstan» bastamasyn iske asyrýdyń birinshi jylynyń qorytyndylaryna arnalǵan respýblıkalyq ekofestıvalden bastalady.
Shara aıasynda "Úzdik ekologııalyq bilim berý mekemesi", balalar arasynda sýǵa uqypty qaraý taqyrybynda sýret salý, "Jasyl Ýnıversıtet" (ekologııa jáne ornyqty damý salasyndaǵy ǵylymı jobalar men bilim berý baǵdarlamalary úshin), "Úzdik ekologııalyq startap joba" respýblıkalyq konkýrstarynyń jeńimpazdary marapattalady.
Estafetany elimizdiń óńirleri de qabyldaıdy. Aptalyq aıasynda qalalar men aýyldarda 200-ge jýyq túrli ekologııalyq is-sharalar ótedi. Sonyń ishinde "Taza aımaq", "Taza sý aıdyndary", "Taza beısenbi”, “Kıeli meken", "Jasyl aımaq", "Móldir bulaq" jáne t. b. aýmaqtardy tazartý boıynsha aksııalar uıymdastyrylmaq.
Aptalyq jalpy respýblıkalyq senbilikpen aıaqtalady. Eldi mekenderdi kógaldandyrý boıynsha aýqymdy aksııa aıasynda 20 myń kóshet otyrǵyzý josparlanýda.
Qazirgi tańda "Taza Qazaqstan" ekologııalyq bastamasyna qatysýshylardyń sany 6 mıllıonnan asty, bul árbir úshinshi qazaqstandyq. Jalpy kúsh-jigermen 1,8 mln. ga aýmaq tazartylıap, 1,1 mln.tonna qoqys jınaldy, 1,6 mln. astam jasyl jelek otyrǵyzyldy, 5 myńnan astam tarıhı-mádenı mura obektileri qalpyna keltirildi.
Aıta ketý kerek, "Taza Qazaqstan" bastamasy aıasyndaǵy ekologııalyq is-sharalar turaqty negizde jalǵasyp, qatysýshylardyń sany artyp keledi. Onyń basty maqsaty - turaqty ekologııalyq mádenıet pen jaýapkershilikti qalyptastyrý, ekologııalyq saýattylyq deńgeıin arttyrý, sondaı-aq tabıǵı resýrstardy basqarýdyń zamanaýı tásilderin engizý.
Elimizdiń barlyq azamattaryn ekologııalyq bastamaǵa qosylýǵa jáne Qazaqstannyń tabıǵatyn saqtaýǵa, elimizdiń ekologııalyq bolashaǵyn jaqsartýǵa óz úlesterin qosýǵa shaqyramyz!