Zamanaýı talapqa saı jóndeýden ótken kitaphana «Ulttyq kitap kúni» merekesi aıasynda oqyrman ıgiligine berildi, dep jazady Egemen.kz.
Jóndeý jumystary Memleket basshysy Qasym-Jomart Toqaevtyń úshinshi Ulttyq quryltaıda bergen tapsyrmasyna oraı júzege asty.
Búgin atalmysh mekemeniń modernızasııadan keıingi ashylý saltanaty ótip, jıynǵa zııaly qaýym ókilderi qatysty. Saltanatty is-sharada belgili jazýshy Sáýle Dosjan, Qazaqstan Ulttyq kitaphanasynyń dırektory Ǵazıza Qudaıbergen, aqyn, aýdarmashy, jýrnalıst Maqpal Mysa aqjarma tilekterin aıtyp, oqyrman qaýymdy quttyqtady.
«Kitaphana – bilim men izdenistiń, tarıh pen jańashyldyqtyń toǵysatyn orny. Sondyqtan, mundaı mekemelerdi jańartý jumystary aldaǵy ýaqytta óńirdiń ózge aýdandarynda da jalǵasyn tabady. Bıyl oblystaǵy úsh kitaphana zamanǵa saı kúrdeli jóndeýden ótpek. Mundaı ıgi bastamalar barsha oqyrmanǵa jańa serpilis berip, el Prezıdenti atap ótkendeı, «Naǵyz oqıtyn ultqa» aınalýymyzǵa jol asharyna senimdimin», dedi Almaty oblystyq mádenıet, arhıvter jáne qujattama basqarmasynyń basshysy Danııar Alıev.