Qazaqstannyń Dúnıejúzilik IýNESKO klýbtary men qaýymdastyqtarynyń Federasııasyna tóraǵalyq etýi aıasyndaǵy THE PLANET OF ART - 2025 atty Halyqaralyq jastar festıvali bastaldy, dep habarlaıdy Egemen.kz.
Joba talantty jastardy qoldaý jáne olardyń shyǵarmashylyq áleýetin júzege asyrýǵa kómektesý, mádenı ózin-ózi kórsetýdiń alýan túrli formalaryn tanymal etý jáne «beıbitshilik mádenıeti» tujyrymdamasy negizinde óskeleń urpaqtyń dostyq baılanystaryn nyǵaıtýǵa baǵyttalǵan.
THE PLANET OF ART – 2025 Festıvali BUU Bas Assambleıasy 2024 jyly qyrkúıekte qabyldaǵan «Bolashaq úshin Paktini» ilgeriletý, Antýan de Sent-Ekzıýperıdiń 125 jyldyǵy, Maııa Plıseskaıanyń 100 jyldyǵy, Abaı Qunanbaıulynyń 180 jyldyǵy, Nurǵısa Tilendıevtiń 100 jyldyǵy jáne basqa da álemdik mádenıetke eleýli iz qaldyrǵan kórnekti qaıratkerlerdiń ataýly kúnderin atap ótý aıasynda júzege asyrylady.
Festıval jas daryndarǵa vokaldyq, aspaptyq jáne horeografııalyq baǵyttarda ózderin kórsetýge múmkindik beredi. Joba ózderiniń kórkemdik daǵdylaryn damytýǵa jáne shyǵarmashylyq arqyly beıbitshilik pen kelisim ıdeıalaryn ilgeriletýge umtylatyn IýNESKO Klýbtary men Qaýymdastyqtary bar, IýNESKO-ǵa múshe elderden 12-18 jas aralyǵyndaǵy qatysýshylarǵa baǵyttalǵan.
THE PLANET OF ART - 2025 halyqaralyq mádenı almasý úshin tuǵyrnama qura otyryp, qazaqstandyq kompozıtorlar men horeograftardyń týyndylaryn qazirgi ınterpretasııalaýdy tanymal etýge yqpal etedi. Festıval shyǵarmashyl jastardy qoldap qana qoımaı, qatysýshylarǵa óz elin álem mádenıetiniń jas ambassadorlary retinde halyqaralyq sahnada tanytýǵa biregeı múmkindik beredi.
Irikteý qazaqstandyq qatysýshylar úshin onlaın týr jáne oflaın tyńdaý arqyly eki kezeńde ótedi, odan keıin úzdik qatysýshylar Qazaqstanda ótetin fınalǵa shaqyrylady. Fınalǵa qatysýshylar Qazaqstan Respýblıkasynyń jetekshi pedagogtary men óner qaıratkerleriniń qoldaýymen uıymdastyrylǵan bilim berý jáne mádenı baǵdarlamaǵa qatysa alady.
Festıvaldiń sońǵy bólimi Almaty qalasynda ótetin jeńimpazdardy marapattaý rásimimen birge aýqymdy Gala-konsert bolmaq. Konsert álemdik mýzykalyq mádenıet pen otandyq kompozıtorlardyń shyǵarmashylyǵyn birtutas teatrlandyrylǵan baǵdarlama aıasynda biriktiredi.