О́zbekstannyń Joǵarǵy soty eldiń eks-prezıdentiniń qyzy Gúlnar Karımovanyń túrmeden bosatylǵany týraly áleýmettik jelide taraǵan aqparatqa qatysty pikir bildirdi, dep habarlaıdy Egemen.kz Gazeta.uz saıtyna silteme jasap.
Joǵarǵy sottyń baspasóz hatshysy Azız Abıdovtiń aıtýynsha, Karımovanyń túrmeden bosatylǵany týraly aqparat shyndyqqa janaspaıdy. Ol qamaýda qaldy.
Gúlnara Kárimovanyń Tashkent oblysyndaǵy kolonııadan bosatylǵany týraly aqparat «Uzbekistan Vision 2030» trast qorynyń jumysyna arnalǵan baspasóz máslıhaty qarsańynda paıda boldy. Qor marqum memleket basshysynyń qyzyna qarsy qozǵalǵan qylmystyq is aıasynda Shveısarııada tárkilengen jáne О́zbekstanǵa qaıtarylǵan qarajatty ashyq ári tıimdi bólý úshin qurylǵan.
О́zbekstan men Shveısarııa arasynda О́zbekstan halqynyń múddesi úshin tárkilengen aktıvterdi qaıtarý týraly birinshi kelisimge 2022 jyldyń tamyzynda qol qoıylǵan. Kelisim О́zbekstanǵa 131 mıllıon dollardy qaıtarýdy qarastyrǵan.
2025 jyldyń aqpanynda О́zbekstan men Shveısarııa Karımovanyń aktıvterin qaıtarý týraly taǵy bir kelisimge qol qoıdy. Qosymsha 182 mıllıon dollardy Shveısarııa О́zbekstan halqyna «Uzbekistan Vision 2030 Trust Fund» arqyly qaıtarady. Qaıtarylǵan qarajattyń jalpy somasy 313 mıllıon dollardy quraıdy.
Buǵan qosa, sáýir aıynda Belgııa bıligi telekommýnıkasııa salasyndaǵy kelisim-sharttardy jasaý kezinde sybaılas jemqorlyq jáne aqshany jylystatý isi boıynsha tárkilengen 108 mıllıon dollardy О́zbekstanǵa aýdarý týraly sheshim qabyldady. Qarajat О́zbekstannyń sot organdarynyń talaby boıynsha tárkilendi.
2015 jyly Gúlnar Karımova bes jylǵa bas bostandyǵynan aıyrylyp, keıin 2019 jyly jalpy rejımdegi kolonııaǵa aýystyryldy. 2020 jyly naýryzda ol «memleket qarajatyn jymqyrǵany jáne О́zbekstannyń múddesine qaıshy mámileler jasaǵany úshin, sondaı-aq basqa bireýdiń múlkin asa iri kólemde tárkilegeni úshin» taǵy 13 jyl tórt aıǵa sottaldy.