Elimizde jasandy ıntellekt salasyn damytýǵa baǵyttalǵan keshendi is-sharalar qolǵa alynyp jatyr. Bul týraly Sıfrlyq damý, ınnovasııalar jáne aeroǵarysh ónerkásibi mınıstrligi uıymdastyrǵan baspasóz máslıhatynda aıtyldy. Is-sharaǵa Jasandy ıntellekt jáne ınnovasııalardy damytý komıtetiniń tóraǵasy Ǵızzat Baıtursynov, «Astana Hub» tehnoparkiniń bas dırektory Danııa Ahmetova qatysty.
Alty baǵytty qamtıdy
2024-2029 jyldarǵa arnalǵan jasandy ıntellektini damytý tujyrymdamasy alty negizgi baǵytty qamtıdy: derekter, ınfraqurylym, adam kapıtaly, ǵylymı zertteýler, quqyqtyq retteý, akselerasııalyq baǵdarlamalar. Qazir bul tujyrymdamany ulttyq strategııaǵa aınaldyrý jumystary júrgizilip jatyr.
«Memleket basshysynyń tikeleı tapsyrmasymen jasandy ıntellekt ekojúıesin qalyptastyrý – bilim berý, ǵylymı zertteýler, ınfraqurylym, normatıvtik-quqyqtyq baza, kásipkerlik syndy birneshe iri komponentti qamtıdy. Biz jasandy ıntellektini damytýdyń keshendi tásilin ustanyp otyrmyz: mektep oqýshylarynan bastap memlekettik qyzmetshilerge deıingi barlyq deńgeıde adam kapıtalyn damytyp, álemdik deńgeıdegi ınfraqurylymdy qurýdamyz», dedi Ǵ. Baıtursynov.
Mınıstrlik ókiliniń baıandaýynsha, 2024 jyldyń 27 sáýirinde Úkimettiń №342 qaýlysy boıynsha mınıstrlik janynan Jasandy ıntellekt jáne ınnovasııalardy damytý komıteti qurylǵan. Bul organ — saladaǵy naqty ister men strategııalyq sheshimderdi úılestiretin ortalyq qurylym.
Sondaı-aq Májilis depýtattary «Jasandy ıntellekt týraly» zań jobasyn daıyndaǵan. Qujat jasandy ıntellekt júıelerin ázirleý men engizýdi keshendi túrde retteýge baǵyttalǵan. Onda memlekettiń salalyq saıasatynyń shekarasy belgilenip, JI júıeleriniń qaýipsizdigi, ashyqtyǵy jáne jaýapkershiligi jónindegi ustanymdar aıqyn kórsetilgen. Sonymen qatar atalǵan tehnologııalardy qoǵam ómiriniń túrli salalaryna etıkalyq ári baqylanatyn túrde endirý joldary qarastyrylǵan.
Infraqurylym men tehnologııalyq damý
Mınıstrlik jasandy ıntellekt úshin tehnologııalyq ınfraqurylymdy qurý sheńberinde «NVIDIA» esepteý qýattaryn el aýmaǵyna eksporttaýǵa ótinim bergen. Sonymen qatar «NVIDIA L40s» arnaıy grafıkalyq vıdeokartalary satyp alynyp, olar «Ulttyq aqparattyq tehnologııalar» AQ jumys istep turǵan derekterdi óńdeý ortalyǵynda ornalastyrylǵan. Bul resýrstar «KazLLM» qazaq úlken tildik modeline negizdelgen memlekettik ónimderdi ornalastyrýǵa paıdalanylady.
«KazLLM» modeli 148 mıllıard tokennen turatyn kóptildi derekter jıyntyǵynda oqytylǵan. Modeldiń 8 jáne 70 mıllıard parametrli eki nusqasy ázirlengen.
«Damyp kele jatqan sýperkompıýterlik ınfraqurylym Ulttyq jasandy ıntellekt platformasymen biriktirilip, memlekettik sıfrlyq ónimderdi ázirleý men engizýdiń negizgi elementi bolady. Platforma derekter jıyntyǵyn, esepteý resýrstaryn, jasandy ıntellekt modelderin ázirleýge, oqytýǵa arnalǵan quraldardy qamtıdy. Onyń negizinde memlekettik qyzmetterge qol jetkizýdi jeńildetýge ári memlekettik organdar qyzmetiniń tıimdiligin arttyrýǵa baǵyttalǵan jasandy ıntellekt agentterdiń 11 prototıpi ázirlendi», dedi mınıstrlik ókili.
Bilim berý
«Astana Hub» tehnoparkiniń bas dırektory Danııa Ahmetovanyń aıtýynsha, «Industrial AI Accelerator» baǵdarlamasy aıasynda taý-ken óndirisi, energetıka, medısına, qarjy tehnologııalary jáne memlekettik qyzmetter salalarynda jasandy ıntellektini engizýge 27 qanatqaqty joba iske qosylǵan. Baǵdarlamaǵa 116 kompanııa ótinim berip, 32 kompanııa irikteýden ótip otyr. Olardyń ishinde 4 jobanyń tıimdiligi dáleldenip, qoldanýǵa usynylyp otyr.
Al adam kapıtalyn damytý maqsatynda mınıstrlik aldaǵy 5 jylda 1 mln adamdy jasandy ıntellektimen jumys isteý daǵdylaryna úıretýdi josparlap otyr. Bul baǵytta «Alem.ai» halyqaralyq jasandy ıntellekt ortalyǵy qurylyp, onda bilim berý, zertteý, startaptardy qoldaý baǵytyndaǵy jobalar júzege asyrylady.
Búginde Sıfrlyq damý, ınnovasııalar jáne aeroǵarysh ónerkásibi mınıstrligi «Astana Hub»-pen birlesip, elimizdiń azamattaryn sıfrlyq bolashaqqa daıyndaýǵa mańyzdy qadamdar jasap jatyr. Jasandy ıntellektini damytý baǵytynda elimizde qolǵa alynǵan mańyzdy bastamalardyń biri – «Decentrathon» dep atalatyn iri kólemdi hakaton. Bul – elimizdiń túkpir-túkpirinen kelgen jas mamandardy biriktiretin kóp lokasııaly tehnologııalyq jarys.
«Sıfrlyq damý, ınnovasııalar jáne aeroǵarysh ónerkásibi mınıstrligi Ǵylym jáne joǵary bilim mınıstrligimen birlese otyryp, jasandy ıntellektimen jumys isteý daǵdylaryna 1 mıllıon otandasymyzdy oqytýdy josparlap otyr. 5 jyl ishinde 500 myń mektep oqýshysy, 300 myń stýdent, 90 myń memlekettik qyzmetker, 80 myń bıznes ókili men túrli salalardaǵy azamattar qamtylmaq. Maqsat – tehnologııalardy tek tutynatyn emes, olardy jasaı alatyn, qoldana biletin urpaq qalyptastyrý», deıdi D.Ahmetova.