Búgin Astanada Memleket basshysy Qasym-Jomart Toqaevtiń qatysýymen «Qazaqstan halqy Assambleıasynyń» HHHIV sessııasy ótti. Sessııada QHA Respýblıkalyq Analar keńesiniń tóraǵasy Nazıpa Shanaı Analar keńesi Assambleıanyń erekshe qurylymdyq birligi ekenin atap ótti, dep habarlaıdy Egemen.kz.
Nazıpa Shanaıdyń aıtýynsha, Qazaqstan halqy Assambleıasynyń Analar keńesi qatarynda 1700-den astam qurylym, 16 myńnan astam belsendi ana bar. Eń úlkeni - 80, al eń jasy – 25 jasta.
«Assambleıa, 1995 jyly - taǵdyry ortaq, maqsaty bir azamattardan qurylǵan qoǵamdyq uıym. Al, búgin Assambleıa – tarıhı sanany qalyptastyrýshy irgeli ınstıtýt, memlekettiń óreli isterin iske asyrýshy iri qoǵamdyq uıym, patrıottar mektebi.
Analar keńesi – sol Assambleıanyń erekshe qurylymdyq birligi. Al, Qazaqstandaǵy ár ananyń mindeti – eline adal azamat tárbıeleý», deıdi Analar keńesiniń tóraǵasy.
Tóraǵanyń aıtýynsha, bul baǵyttaǵy jumysty tek qana bilim mekemeleriniń moınyna ilip qoıýǵa bolmaıdy.
«Mektep – ata-ana – oqýshy» úshtiginiń birligi ǵana oń nátıje beredi. Osy baǵytty nyǵaıtý maqsatynda Analar keńesiniń biriktirýshi róli orasan. «Qazaqstan balalary» baǵdarlamasyn ázirleý, túsindirý jáne iske asyrý jumysyna Analar keńesi belsendi qatysýǵa daıyn. Jańa baǵdarlama - bala daýysyn estıtin, sol daýysqa qulaq salatyn qoǵamdyq sanany qalyptastyrady dep senemiz», dedi N. Shanaı.
Búgingi tańda Analar keńesi ortalyq jáne jergilikti memlekettik organdardyń senimdi seriktesine aınaldy.
«О́tken jyly Farmakologııa komıtetimen birlesip «Veıpke tyıym» jobasyn júrgizdik. Qoǵamǵa túsindirý jumysynyń arqasynda jáne QR Prezıdentiniń qoldaýymen tolyǵymen tyıym salynǵan zań qabyldandy. Bul zań - bizdiń ult retinde joıylyp ketpeýimizdiń aldyn-alyp otyr. Sol úshin, sizge - barsha Qazaqstan analary atynan rahmet aıtamyn.
2023 jyldan beri bizdiń kásibı psıhologtarymyz áskerı stýdentter men jaýyngerler arasynda qumar oıyndaryna táýeldilikten qutylý, sýısıdtiń aldyn-alý, kúızelisten shyǵý joldary boıynsha júıeli jumys júrgizip otyr», dedi Analar keńesiniń tóraǵasy.
Onyń aıtýynsha, Prezıdenttiń qoǵamdyq 5 keselge qarsy kúres júrgizý týraly tapsyrmasy «Salaýatty sana» jobasy arqyly oryndalyp jatyr.
«Analardyń maqsaty – sol keselderdiń aldyn-alý. Ol úshin, eń aldymen, otbasy ınstıtýtyn nyǵaıtý qajet. Turmystaǵy zorlyq-zombylyq boıynsha zańnamaǵa engizilgen ózgerister, balalar men áıelderge qatysty qylmystardyń báseńdeýine yqpal etti. Degenmen, zorlyqsyz qoǵam qurý úshin - tereń parasatty áke, joǵary mádenıetti ana, ulttyq sanasy qalyptasqan bala kerek. Sondyqtan, biz, dástúrli jáne otbasylyq qundylyqtardy saqtaý, rýhanı-adamgershilik tárbıe berýdi jumysymyzdyń negizgi baǵyttaryna aınaldyrdyq», deıdi ol.
Assambleıa analary «Azamat tárbıelegen otbasy», «Altyn shańyraq», «Kúmis kerege» degen nomınasııalarmen úlgili otbasylaryn marapattaý, «El anasy» qurmetti ataǵyn berý, «Aıaly alaqan» alqasyn tapsyrý arqyly otbasy ınstıtýtyn qoldaý sharalaryn atqaryp júr.
«Memleketimizde júrgizilip jatqan reformalardyń nátıjesin urpaqtarymyzdyń adamı bolmysynan, óreli is-áreketinen kóretin kún alys emes. Biz, analar, oǵan senimdimiz», deıdi N.Shanaı.
Aıta keteıik Sessııaǵa QR Parlamentiniń depýtattary, elimizdiń barlyq óńirlerinen kelgen Assambleıa músheleri, respýblıkalyq jáne óńirlik etnomádenı birlestikterdiń tóraǵalary qatysty.