Endi jetisýlyq jas mamandar irgeli kásiporyndarǵa baryp jumys isteı alady. Burynǵydaı qolyna dıplomyn alyp, qyzmet izdep qala kezip júrmeıdi. О́ńirge qajetti kadrlardy jergilikti oqý oryndarynan alýdy kózdegen zaýyt basshylarynyń usynysy qabyldandy. Oǵan kolledj dırektorlary da múddeli bolyp otyr. Osylaısha, eki tarap ózara 10 memorandým jasady.
Jobany júzege asyrý maqsatynda Taldyqorǵan qalasynda «Jumysshy mamandyqtar: jańa kezeń, jańa múmkindikter» atty taqyrypta forým ótti. Oǵan jumys berýshi kásiporyndar, bilim mekemeleriniń ókilderi, stýdentter – jalpy sany 150-den astam adam qatysty. Forým aıasynda óńirdegi kolledjder men irgeli kásiporyndar arasynda kelisim jasalyp, osy jyldan bastap iske asatyny belgili boldy.
«Kolledj joǵary oqý orny sanalmaıdy, dıplomy bir saty tómen. Soǵan saı barǵan jerde jalaqy kórsetkishi óte tómen bolady. О́ńirden qatar bitirgen kóptegen bala úlken qalalarǵa baryp, sonda tájirıbe jınap júr. Bul múmkindik biz sekildi bolashaq jas mamandarǵa úlken serpin beredi. Aldaǵy ýaqytta «Qaınar AKB» akkýmýlıator zaýytynda is-tájirıbeden ótsem dep otyrmyn. Bári jaqsy bolsa, sonda qyzmet etpek oıym bar. О́ńirde áke-sheshemniń qasynda bolǵanym durys. Basqa jerge jumys izdep barmaımyn», deıdi stýdent Almas Qalqamanuly.
Memorandým óz kezeginde tehnıkalyq kolledj stýdentteriniń tájirıbeden ótýine, bitirýshilerdiń jumysqa ornalasýyna múmkindik beredi. Kelisim jasalǵan kásiporyndardyń arasynda «Qaınar AKB» akkýmýlıator zaýyty, «Aqsý Qant» JShS, «JLC Sút» JShS, «Jarkent krahmal-sirne zaýyty» JShS, «Qazsýshar» RMK Jetisý fılıaly bar.
Forýmǵa qatysýshylardy quttyqtaǵan oblys ákiminiń orynbasary Marlen Kólbaev óńirde jastardy jumysshy mamandyqtaryna tartýǵa, qajetti kásipterge daıarlaýǵa baǵyttalǵan jumystarǵa qysqasha toqtaldy. Osy mańyzdy mindetterdi áleýmettik seriktestermen birlesip atqarýdaǵy josparlaryn da atap ótip, birlesip jasalǵan jumystyń nátıjeli bolatynyn jetkizdi.
«О́ńirdegi jastar jumyssyz qalmaýy kerek. Bilikti jas kadrlardyń óńir ekonomıkasyn damytýyna jol ashqan abzal. Bizde júzdegen kásiporyn men zaýyttar bar. Olarda tájirıbeden ótken jas mamandar óz isiniń sheberi bolady. Agrarly óńirde aýyl sharýashylyǵy salasynyń qyr-syryn biletin mamandardy kóptep shyǵarýymyz qajet», dedi M.Kólbaev.
Birqatar spıker bilikti jumysshy kadrlardy daıarlaýdyń negizgi máseleleri jaıly sóz qozǵady. Stýdentter Dmıtrıı Sýnchınıanov pen Shyryn Bolatbekqyzy halyqaralyq standarttardyń bilim úderisine ıntegrasııalanýy týraly ózderiniń tájirıbelik baqylaýlary jóninde baıandady.
Forým barysynda kolledj túlekterine olardyń kásibı biliktiligin rastaıtyn, jumysqa ornalasýda basym quqyq beretin «Altyn karta» tapsyrý rásimi atqaryldy. Tekeli kásiptik kolledjiniń «Dánekerleýshi», Sarqan polıtehnıkalyq kolledjiniń «Elektr jabdyqtary», Bastóbe kolledjiniń «Aspaz» mamandyǵy boıynsha bitirgen jas mamandaryn qabyldaǵan jumys berýshiler qatarynda «KazMunaıGazPromStroıServıs» JShS kásiporyndary, «IP Lı A.D.», «TATEK» AQ bar.
Is-shara barysynda «WorldSkills Kazakhstan 2024» respýblıkalyq kásibı sheberlik chempıonatynyń jeńimpazdary men júldegerleri marapattaldy. Bul bilim mekemeleri men bıznes arasyndaǵy tıimdi baılanystardy nyǵaıtýda mańyzdy qadam boldy, sondaı-aq jastardyń bolashaǵy bar jumysshy mamandyqtaryn tańdaýyna qoldaý kórsetýge yqpal etedi.
Jalpy, oblysta 27 kolledj bar, onda 13 900-den astam stýdent oqıdy. 2024 jyly mamandardy daıarlaýǵa arnalǵan memlekettik tapsyrys 4250 oryn bolǵan, bıýdjettik oryndardyń basym bóligi IT, qurylys, ınjenerııa, metallýrgııa sııaqty tehnıkalyq mamandyqtarǵa tıesili. Bilim sapasyn arttyrý úshin ótken jyly óńirde 13 jańa mamandyq ashylsa, bıyl 14 jańa mamandyq ashý kózdelgen. Bul qatarda óndiristiń avtomattandyrylǵan júıeleri, mehatronıka, sáýlettik jobalaý, orman jáne balyq sharýashylyǵy sııaqty mamandyqtar bar. 2025 jyly oblystaǵy kolledjderge 4500 adamdy qabyldaý josparlanǵan.
О́ńir ákimi baspasóz qyzmetiniń málimetinshe, Jumysshy mamandyqtary jyly aıasynda oblysta 70-ten astam is-shara ótedi. Sonyń ishinde «ZhetysuFest», «WorldSkills Zhetysu 2025», «AgroSkills-2024» chempıonattary, sondaı-aq stýdentterge arnalǵan kásibı konkýrstar uıymdastyrylady. Oblys ákiminiń qoldaýymen Taldyqorǵan joǵary polıtehnıkalyq kolledjiniń bazasynda jumysshy mamandyqtar alańyna aınalatyn «Zhetysu Skills» ortalyǵy salynady.
Jetisý oblysy