2025 jyldyń 25 sáýirinde Almaty oblysynyń qylmystyq ister jónindegi soty aldyn ala sóz baılasý arqyly qasaqana kisi óltirgeni úshin alty sottalýshyǵa úkim shyǵardy, dep habarlaıdy Egemen.kz.
Almaty oblystyq soty úkimniń mán-jaıyn aıtty. Osylaısha, sot 2024 jyldyń maýsym aıynda Qonaev qalasyndaǵy «Aleks» demalys aımaǵynda eki sottalýshy men jábirlenýshi arasynda janjal shyǵyp, onyń tóbeleske ulasqanyn anyqtady.
«Jábirlenýshi basym túsip, sodan keıin aıyptalýshylarda kisi óltirýge baǵyttalǵan qylmystyq nıet paıda boldy. Osy oılaryn júzege asyrý úshin olar taǵy tórt adamdy tartqan. Sol keshtiń ózinde Qonaev kóshesindegi HQKO mańynda olar jábirlenýshige birneshe ret oq atqan, nátıjesinde ol aýrýhanaǵa bara jatqan jolda kóz jumdy. Onyń dosy jaraqat alǵan, biraq der kezinde kórsetilgen medısınalyq kómektiń arqasynda aman qaldy», delingen habarlamada
Sot barlyq aıyptalýshylardy kináli dep tapty. Kisi óltirgeni úshin eki er adam 19 jylǵa, qalǵan tórteýi 17 jylǵa sottaldy.
«Sondaı-aq sottalýshylardyń biri jalǵan aıǵaq bergeni úshin kináli dep tanylyp, oǵan eki jyl alty aıǵa bas bostandyǵyn shekteý jazasy taǵaıyndaldy. Sot jazany jeńildetetin mán-jaılar retinde sottalýshylardyń kámeletke tolmaǵan balalary men sottylyǵynyń bolmaýyn qarastyrdy. Atys qarýyn qoldaný jazany aýyrlatatyn mán-jaı dep tanyldy», delingen habarlamada.