Aýyl balasy ǵalamshardy zertteıtin jasandy ıntellekt úlgisin shyǵardy. Ǵylymǵa qushtar jas zertteýshi endi osy baǵdarlamasy arqyly Marstyń klımatyn boljamaqshy. Onyń bul jobasy halyqaralyq deńgeıde joǵary baǵalanyp, ǵaryshtyq zertteýler salasyndaǵy jańa qadamǵa aınalyp otyr.
Abaı oblysy Aıagóz aýdanynyń 10-synyp oqýshysy Jaqsylyq Sekenov jasaǵan baǵdarlama «Kaggle» platformasyndaǵy aýa raıy málimetterin, onyń ishinde NASA-nyń ǵaryshtyq quraldarynan alynǵan ashyq derekterdi qoldanady. Mashınalyq oqytý ádisteriniń kómegimen júıe temperatýrasynyń ózgerýin anyqtap, Marstaǵy ýaqyt, ornalasqan jer jáne maýsymdarǵa qaraı temperatýranyń qalaı ózgeretinin boljaıdy. Jaqsylyq úsh túrli modeldi synap kórdi: syzyqtyq regressııa, «Random Forest» jáne «Gradient Boosting». Sońynda onyń tańdaýy eń dál nátıje bergen «Gradient Boosting» modeline túsipti.
О́z jobasy týraly oqýshy: «Men ózge planetalardaǵy klımat qalaı jumys isteıtinin túsingim keldi. Mars erekshe qyzyqtyrdy, sebebi onda atmosfera joqtyń qasy, al temperatýra kúrt ózgeredi. Osyndaı jaǵdaılardy jasandy ıntellekt arqyly esepteýge bola ma degen oı mazalady. Negizi bul ıdeıa Marsqa zertteý júrgizetin ǵaryshtyq qurylǵylar týraly derekti fılm kórgennen keıin paıda boldy», deıdi.
Jaqsylyq tehnıkalyq bóligin ashyq derekkózder men oqytý platformalaryn, NASA derekterin paıdalana júrip óz betinshe meńgergen. Keıipkerimiz bolashaǵyn ǵaryshtyq tehnologııalar salasymen baılanystyrǵysy keledi. Ol ózge planetalardy zertteýge, bolashaqta ǵaryshtyq mıssııalarǵa daıyndalýǵa kómektesetin ıntellektýaldy júıeler jasaýdy armandaıdy.