Jeńistiń 80 jyldyǵyna oraı Keńes odaǵynyń batyry, áskerı qolbasshy, jazýshy Baýyrjan Momyshulynyń 115 jyldyǵyna arnalǵan is-sharalar legi Baýkeń týǵan Jýaly aýdanynan bastaý aldy, dep habarlaıdy Egemen.kz.
Dańqty tulǵany eske alý is-sharasyna QR Bas prokýrory Berik Asylov, Jambyl oblysynyń ákimi Erbol Qarashókeev, oblys prokýrory Nurǵalym Ábdirov, qoǵam qaıratkeri, jazýshy, batyrdyń kelini Zeınep Ahmetova, sondaı-aq quqyq qorǵaý organdary men kúshtik qurylymdardyń ókilderi jáne aýdan turǵyndary qatysty.
Jınalǵandar Baýyrjan Momyshulyn bir mınýt únsizdikpen eske alyp, erligine qurmet kórsetip, eńseli eskertkishine gúl shoqtaryn qoıdy. Bul kúni Jýaly aýdandyq prokýratýrasynda Baýyrjan Momyshulynyń mereıtoıyna oraı memorıaldyq taqtanyń saltanatty ashylý rásimi ótti.
Eń áýeli QR Bas prokýrory Berik Asylov quttyqtaý sóz sóıledi.
«Uly Jeńistiń 80 jyldyǵy men Baýyrjan Momyshulynyń 115 jyldyq mereıtoıy tuspa-tus kelip otyr. Osy aıtýly datalar aıasyndaǵy is-sharalar Jambyl oblysynyń Jýaly aýdanynan bastaý aldy.
Baýyrjan Momyshuly – týǵan jerin qorǵaýda erliktiń shyńyna shyǵyp, soǵystyń qatal synaqtarynda qaısarlyq pen tabandylyqtyń eren úlgisin kórsetti. Batyrdyń halqyna degen súıispenshiligi, ulttyq qundylyqtardy saqtaýǵa qosqan úlesi de erekshe. Onyń qalamynan týǵan eńbekteri, danalyq sózderi – óskeleń urpaq úshin rýhanı temirqazyq.
Ol maıdanger, batyr, jazýshy ǵana emes, ol 1931-1932 jyldary Jýaly aýdanynyń prokýrory qyzmetin atqarǵan. Bul – biz úshin zor maqtanysh ári úlken jaýapkershilik! – dedi Bas prokýror.
Jambyl oblysynyń ákimi Erbol Qarashókeev búgingi ıgi is-sharalar eldigimizdi nyǵaıtyp, tarıhty tanýǵa zor úles qosatynyn atap ótti.
«Qazaq halqy barda atamyzdyń aty óshpeıdi, halyqpen máńgi jasaıdy», – degen Zeınep Ahmetova eldiń amandyǵyn, jerdiń tynyshtyǵyn tilep, aq batasyn berdi.
Kópshilikke aýdandyq prokýratýra ǵımaratynda Baýyrjan Momyshulyna arnalǵan «Tártipsiz el bolmaıdy, tártipke baǵynǵan qul bolmaıdy» taqyrybynda jasaqtalǵan tanymdyq burysh tanystyryldy. Is-shara aıasynda qatysýshylar aǵash kóshetterin otyrǵyzdy. Uly Jeńistiń 80 jyldyǵy men Keńes Odaǵynyń Batyry Baýyrjan Momyshulynyń 115 jyldyǵyn atap ótý Jambyl oblysy prokýratýrasynyń «Zańdylyq» alańynda eskertkish taqtanyń ashylýymen jalǵasty.
Oblys prokýratýrasynyń bastamasymen ashylǵan taqta – qazaqtyń batyr uly, Jýaly aýdanynyń prokýrory qyzmetin atqarǵan Baýyrjan Momyshuly men Uly Otan soǵysyna qatysqan prokýrorlardyń qurmetine ornatyldy.
Jambyl oblysy