EXPO 2025 Osaka dúnıejúzilik kórmesindegi Qazaqstan Respýblıkasynyń Ulttyq pavılony 100 myńynshy kelýshini qarsy aldy. Ol – Nara qalasynyń 37 jastaǵy turǵyny, japondyq Jeke qarjylyq bastamalar qaýymdastyǵynyń joba menedjeri Akıba Akıhıto, dep jazady Egemen.kz.
«Men pavılondaryńyzdyń 100 myńynshy qonaǵy bolǵanyma óte qýanyshtymyn, bul men úshin kútpegen tosyn syı! Men pavılonnyń kontenttik mazmunyna, atap aıtqanda, Qazaq handyǵynyń qalyptasý tarıhyna jáne tarıh pen jańa tehnologııalardyń úılesimin kórip tańǵaldym. Tamyry tereńge jaıylǵan tarıhtaryńyzdy umytpaı, bolashaqqa degen kózqarastaryńyzdyń tamasha úlgisi – «ALEM» qurylǵysy. Uıymdastyrýshylarǵa jyly lebizderi úshin jáne tańǵajaıyp eldiń baı mádenıeti men tarıhy týraly kóbirek bilýge múmkindik alǵanym úshin raqmet. Qazaqstannyń mádenıetimen tanysý úshin Qazaqstanǵa baryp Túrkistandy kórgim keledi», dedi Akıba Akıhıto.
Qazaqstan pavılony men elimizdiń atynan 100 myńynshy qonaqty Qazaqstan Respýblıkasynyń Japonııadaǵy Tótenshe jáne О́kiletti Elshisi Erlan Baýdarbek-Qojataev quttyqtady.
Akıba Akıhıtoǵa Karavansaray Turkistan týrıstik keshenine eki adamǵa arnalǵan sertıfıkat pen estelik kádesyılar tabystaldy.
Kelýshiler sanyn esepteýdi japondyq EXPO 2025 Osaka dúnıejúzilik kórmesin ótkizý qaýymdastyǵy arnaıy jabdyqtyń kómegimen júrgizedi. Qaýymdastyq mamandarynyń aıtýynsha, pavılon shaǵyn bolǵanymen, qazaqstandyq ekspozısııa kórme qonaqtaryna oılastyrylǵan kontentimen jáne joǵary tehnologııalyq eksponattarymen qyzyqty.
Pavılon kontenttik mazmunyna, atap aıtqanda tarıhqa, mádenıetke, ekonomıkalyq kórsetkishterge, ekojúıege, týrızmge, ınnovasııaǵa asa den qoıylyp ázirlengen tórt aımaqtan turady.
Sonymen qatar pavılon eldiń ınvestısııalyq jáne ekonomıkalyq áleýetin kórsetedi. Sondaı-aq aǵzalardy transplantasııalaý jáne oqshaýlanǵan organdardy emdeý salasyndaǵy jetistik – «ALEM» (Astana Life Ex-situ Machine) ınnovasııalyq qurylǵysy usynyldy. Jetekshi qazaqstandyq medısınalyq zertteýshiler men ınjenerler ázirlegen «ALEM» oqshaýlanǵan aǵzada qajetti aralasýlar men maqsatty emdeý júrgizý múmkindigimen donorlyq múshelerdi 24 saǵattan artyq saqtaýǵa múmkindik beredi.