Qazaqstanda qurylys salasynyń ashyqtyǵy men tıimdiligin arttyrý maqsatynda jańa biryńǵaı portal engiziledi. Bul týraly Úkimet otyrysynda О́nerkásip jáne qurylys vıse-mınıstri Qýandyq Qajkenov málimdedi, dep habarlaıdy Egemen.kz.
Mınıstrliktiń bastamasymen ázirlenip jatqan júıe qurylystyń barlyq kezeńderin — josparlaý, jobalaý jáne obektini salýdy tolyq qamtıdy. Biryńǵaı tereze qaǵıdaty boıynsha qurylatyn portal salalyq júıelerge úzdiksiz ótý múmkindigin qamtamasyz etedi.
«Qazirgi ýaqytta júıe 89 qalanyń qalalyq jobalaryn jáne ınjenerlik ınfraqurylymnyń 92,4%-yn qamtıdy. Qala qurylysy qyzmetiniń ashyqtyǵyn, qala jobalaryn ázirleý men iske asyrýdyń sáıkestigin qamtamasyz etý maqsatynda mınıstrlik nysannyń biregeı nómirin engizýdi pysyqtady. Bul birizdendirý qujattardyń bastamadan bastap paıdalanýǵa engizilgenge deıingi nysanaly maqsatqa sáıkestigin túpkilikti tekserýdi qamtamasyz etedi», dedi Qýandyq Qajkenov.Sonymen qatar, mınıstrlik jasandy ıntellekti paıdalana otyryp, eldi mekenderdiń bas josparlary men egjeı-tegjeıli josparlaý jobalarynyń iske asyrylýyn qadaǵalaıtyn tehnologııany synaqtan ótkizýdi josparlap otyr. Bul júıe jergilikti jerlerdi kompıýterlik kórý arqyly zerttep, naqty derekterdi bekitilgen jobalarmen salystyrady. Anyqtalǵan sáıkessizdikter týraly aqparat tıisti baqylaý organdaryna jiberiledi.
Sıfrlandyrý jumystary qurylys kezeńin de qamtıdy. Osy maqsatta barlyq qurylys qatysýshylary úshin biryńǵaı sıfrlyq alań — E-Qurylys platformasy iske qosylady. Bul júıe arqyly atqarýshylyq qujattamalardy júrgizý, tehnıkalyq qadaǵalaý esebin tapsyrý, profılaktıkalyq baqylaý, biliktilik talaptaryna sáıkestikti tekserý jáne ruqsattardyń biryńǵaı tizilimin júrgizý múmkindigi beriledi.
Jańa júıe bıýdjet qarajaty men kvazımemlekettik sektor esebinen iske asyrylatyn barlyq qurylys nysandarynda mindetti túrde qoldanylatyn bolady.