28 sáýirde QR Premer-mınıstriniń orynbasary – Úkimet Apparatynyń basshysy Ǵalymjan Qoıshybaev bastaǵan Qazaqstan delegasııasy Túrikmenstannyń Arkadag qalasynda ótken Ekonomıkalyq yntymaqtastyq uıymynyń óńirdegi Ornyqty damý jónindegi birinshi forýmyna qatysty, dep habarlaıdy Egemen.kz Úkimettiń baspasóz qyzmetine silteme jasap.
Plenarlyq otyrysta sóz sóılegen Ǵalymjan Qoıshybaev Forým saýda-ekonomıkalyq jáne ınvestısııalyq áleýetti nyǵaıtý jáne tereńdetý, sondaı-aq óńiraralyq baılanystardy keńeıtý jónindegi Uıymǵa qatysýshy elderdiń ózara is-qımylynyń mańyzdy quralyna aınalǵanyn atap ótti.
«Ornyqty damý maqsattaryna qol jetkizý – Qazaqstan úshin ulttyq basymdyq. Astana EYU-ǵa aǵymdaǵy tóraǵalyq etý kezeńinde saýda kedergilerin joıý, logıstıkalyq ózara baılanysty damytý, standarttardy birizdendirý jáne óńirdegi ekonomıkalyq ıntegrasııaǵa yqpal etetin sıfrlyq platformalar ázirleý máselelerin ilgeriletýge baǵyttalǵan», dep atap ótti ol.
Sapar barysynda Túrikmenstan basshylyǵymen ekijaqty birqatar kezdesý ótti. Qazaqstan delegasııasynyń basshysyn Prezıdent S.G. Berdimuhamedov qabyldady. Mınıstrler kabıneti tóraǵasynyń orynbasary – syrtqy ister mınıstri Rashıd Meredov, Mınıstrler kabıneti tóraǵasynyń orynbasary Nokergýly Atagýlyev jáne basqa da ókildermen ekijaqty kelissózder júrgizildi.
Túrikmenstan basshysymen áńgime barysynda Ǵalymjan Qoıshybaev aldaǵy joǵary deńgeıli kezdesýlerge daıyndyq boıynsha atqarylyp jatqan is-sharalar týraly habardar etti. Ol memleketter kóshbasshylary arasyndaǵy belsendi saıası dıalogtiń arqasynda sońǵy ýaqytta qazaq-túrikmen qarym-qatynasy kópjosparly ózara is-qımyldyń sapaly jańa deńgeıine kóterilgenin atap ótti.
Qazaqstannyń ónerkásip, energetıka, kólik jáne logıstıka, aýyl sharýashylyǵy jáne basqa da salalardaǵy bolashaǵy zor jobalardy iske asyrý úshin «jasyl dáliz» ashýǵa yqpal etýge umtylysyna nazar aýdaryldy. Gaz salasyndaǵy jobalardy birlesip iske asyrý ekijaqty ekonomıkalyq áriptestikti odan ári damytýda berik negiz bola alatyny atap ótildi.
Sonymen qatar forým aıasynda Iran Islam Respýblıkasynyń vıse-prezıdenti Hamıd Poýr Mohammadımen kelissózder júrgizildi. Taraptar barlyq deńgeıdegi ekijaqty kezdesýlerdiń joǵary serpinin, kópjaqty formattaǵy ózara is-qımyldyń qarqyndylyǵyn, sondaı-aq eki el arasyndaǵy saýda-ekonomıkalyq yntymaqtastyqtyń aıtarlyqtaı áleýetin atap ótti.