Tájikstannyń Dýshanbe qalasynda 8–18 jas aralyǵyndaǵy jasóspirimder arasynda batys Azııa chempıonaty ótip, jerlesterimiz 39 medal oljalady. 13 elden 391 shahmatshy qatysqan saıysta órenderimiz rapıd, blıs pen klassıkadan 16 altyn, 9 kúmis, 14 qola medal ıelendi. Astanalyq Ádınur Ádilbek (O8) pen Amalııa Edresheva (G8) rapıdten de, blısten de top jardy. Rapıdten synǵa túskender arasynda Symbat Jetpis (G10, Atyraý oblysy), Nurasyl Pirimbetov (O12, Astana), Aldııar Jaýynbaı (O14, Astana), Álıhan Dáýlet (O16, Almaty), Ásııa Asylhan (G16, Túrkistan oblysy) altyn medal ıelendi. Astanalyq Ámirjan Ánetov (O10) pen almatylyq Marııa Holıavko (G14) blısten de, klassıka synynan da barlyq qarsylastaryn súrindirip, batys Azııa chempıony atandy. Bulardan ózge blısten Málıka Japparbekova (G16, Astana) da jeńiske jetse, klassıka synynda Álimjan Jaýynbaı (O12, Astana), Sultanbeıbarys Dýmanuly (O16, Abaı oblysy) altyn medalmen oraldy.
Sporttyq gımnastıkadan Mysyrdyń Kaır qalasynda ótken álem kýboginde Mılad Karımı altyn medal enshiledi. Erkin jattyǵý saıysynda 14,133 upaımen jeńiske jetti. Álem chempıonatynyń qola júldegeri keleshekte Olımpıadanyń altynyn alýdy kózdeıdi. Mılad bıyldyń ózinde álem kýboginde úshinshi márte dara shyqty.
Dzıýdodan Taılandta ótken Azııa chempıonatynan balýandarymyz 4 qola medalmen oraldy. Erler men áıelder komandasy tolyq quramda qatysyp, eshqaısysy da fınalǵa jete alǵan joq. Ǵalııa Tynbaeva (48 kg), Sherzod Davlatov (60 kg), Baqyt Qusaqbaeva (57 kg), Maksım Meıirlan (90 kg) qola medal ıelendi.
Qytaıdyń Taıan qalasynda taekvondodan ótken «President’s Cup – Asian Region» halyqaralyq týrnırinen jerlesterimiz 1 kúmis, 2 qola enshiledi. Samırhon Ababakırov (63 kg) kúmis júldeni mise tutsa, Batyrhan Tóleýǵalı (80 kg) men Azıza Qarajanovaǵa (53 kg) qola medal buıyrdy.