QR Sot ákimshiliginde aımaqtardaǵy departamentter basshylarynyń beıne baqylaý kamerasy arqyly qatysýymen keńes ótti. Keńesti Sot ákimshiliginiń basshysy N.Ahmetzakırov júrgizdi. Onda 2025 jyldyń birinshi toqsanynda jasalǵan jumystar saralanyp, qorytyndysy shyǵaryldy, dep habarlaıdy Egemen.kz.
Keńes otyrysynda Sot ákimshiliginiń Almaty qalasy, Almaty, Aqmola, Túrkistan, Qaraǵandy, Jetisý, Ulytaý jáne Aqtóbe oblystary boıynsha departamentteriniń basshylary bir toqsan boıy jasaǵan jumystaryn baıandady. Onyń ishinde ár óńirge jańadan sot ǵımarattaryn salý, ınfraqurylym júrgizý jáne sottardyń jumysyn uıymdastyrýdy jaqsartý baǵytynda qandaı sharalar qolǵa alynǵanyn atap ótti.
Jyl basynan beri Aqtóbe oblysynyń Hromtaý jáne Qarǵaly aýdandyq sottarynda ǵımaratty jóndeý jumystary aıaqtalǵan. Al Shalqar aýdandyq sotynyń ǵımaratyna kúrdeli jóndeý jumystary bastalǵan.
Almaty oblysynda qylmystyq jáne mamandandyrylǵan sotynyń, Túrkistan oblysynyń Túlkibas jáne Tólebı aýdandarynda aýdandyq sottyń, sondaı-aq Taraz qalasynyń № 2 sotynyń sot ǵımarattaryn qaıtadan salý úshin jobalyq-smetalyq qujattama memlekettik saraptamaǵa jiberilgen.
QR Sot ákimshiliginiń Atyraý jáne Aqtóbe oblystaryndaǵy departamenti basshylarynyń aıtýynsha Atyraý qalasynyń № 2 sotynyń qurylys (keńeıtilý) jobasy, sondaı-aq Aqtóbe oblysynyń Baıǵanın, Yrǵyz jáne Temir aýdandyq sottarynyń jobalary daıyn, tek qarjylandyrýdy kútip otyr.
Aqtóbe oblystyq sotynyń jáne Pavlodar oblysynyń Ertis jáne Sharbaqty aýdandyq sottarynyń jobalyq-smetalyq qujattaryn túzetý mamyr aıynyń sońyna deıin aıaqtalady dep josparlanǵan.
Keńes barysynda memlekettik-jekemenshik áriptestik tetigi aıasynda Aqmola oblysy boıynsha departamenti oblystyq sotynyń irgeles aýmaǵyndaǵy aýdany 280 m² eki qabatty ǵımarattyń qurylysy bastalǵany aıtyldy.
Batys Qazaqstan oblysynda Báıterek aýdandyq sotynyń ǵımaratynyń qurylysy da mamyr aıynda bastalady.
Sonymen qosa, Prezıdenttiń tapsyrmasy aıasynda Quqyqtyq saıasat tujyrymdamasy men Sýdıalardyń IX seziniń sheshimderine sáıkes Qaraǵandy jáne Aqtóbe oblystarynda sottardy biriktirý boıynsha daıyndyq jumystary júrgizilip jatyr.
Keńes sońynyda QR Sot ákimshiliginiń basshysy N.Ahmetzakırov sottardy jańǵyrtý kezinde árbir bıýdjettik sheshim ashyq bolýy kerektigin, al jobalar sapaly ári der kezinde júzege asyrylýy tıistigin atap ótti. Ol sondaı-aq aýmaqtyq departament basshylaryn qarajattyń maqsatty jumsalýyn jeke baqylaýǵa alyp, sybaılas jemqorlyqqa qarsy is-qımyl sharalaryn júrgizip, qoǵamnyń senimin arttyrý úshin turǵyndarmen jedel keri baılanys ornatýǵa shaqyrdy.