2024 jyldyń maýsym aıynda Ulytaý oblysy boıynsha Bıler keńesi qurylyp, resmı túrde óz jumysyn bastaǵan edi. Bıler quramyna zańgerler men qoǵam belsendileri kirdi, dep habarlaıdy Egemen.kz.
Keńestiń negizgi maqsaty — qoǵamdaǵy daý-damaılardy, azamattyq jáne turmystyq janjaldardy sotqa jetkizbeı, bitimgershilik arqyly sheshý, sondaı-aq ulttyq kelisim men birlikti saqtaýǵa yqpal etý.
Ulytaý oblystyq ákimdiginiń májilis zalynda Bıler keńesiniń quryltaıy ótti. Oǵan oblystyq bıler keńesiniń músheleri, sýdıalar, medıasııa salasynyń mamandary jáne qoǵam belsendileri qatysty.
Jıyndy Ulytaý oblysy Qoǵamdyq damý basqarmasynyń basshysy Baqytjan Jaılaýbaev ashty.
Quryltaı aıasynda bıler ınstıtýtynyń búgingi qoǵamdaǵy mańyzy men róli, sondaı-aq onyń damýyna qatysty máseleler talqylandy.
«Bıler keńesi — tarıhı negizi tereńde jatqan ınstıtýt. Bul - dalalyq demokratııanyń, halyq danalyǵy men ádildiktiń nyshany. Osy dástúrdi saqtaı otyryp, búgingi Bıler keńesi de eki tarapty tyńdap, ádiletti sheshim qabyldaıdy, taraptardy ózara kelisimge keltiredi», deıdi Ulytaý oblystyq sotynyń sýdıasy Sársen Saǵatov.
Quryltaıdyń moderatorlary – Ulytaý oblysy boıynsha Bıler keńesiniń tóraǵasy Nurlan Tabylǵanov jáne oblystaǵy Halyqaralyq medıasııa ortalyǵynyń dırektory Juldyz Esmýrzına boldy.
Quryltaıda Bıler keńesiniń qyzmeti arqyly qoǵamda beıbitshilik pen ózara túsinistikti saqtaý, quqyqtyq mádenıetti qalyptastyrý, medıasııaǵa mán berý qajettiligi aıtyldy.
Baıaǵy qazaqtyń dala zańynda bolǵan dástúrli Bıler keńesi bitimgershilikti qazirgi zamanǵy quqyqtyq talaptarmen ushtastyra otyryp, qyzmet ete beredi.
Ulytaý oblysy