Almaty oblysynda qutqarýshylar kóshede oınap júrip, joǵalyp ketken 2 balany tabýǵa kómektesti, dep habarlaıdy Egemen.kz.
Tótenshe jaǵdaı mınıstrliginiń habarlaýynsha, 30 sáýir kúni keshke Talǵar aýdanynda eki bala jeke turǵyn úıdiń aldynda kóshede oınap júrip, joǵalyp ketken. Ata-analar balalaryn ózdiginen taba almaǵandyqtan, qutqarýshylardyń kómegine júgingen.
Táýliktiń qarańǵy ýaqytyna qaramastan túni boıy jalǵastyrylǵan izdeý jumystaryna 2 kınologııalyq eseptop pen ushqyshsyz ushý apparaty tartyldy. Buǵan qosa, izdeýge balalardyń jaqyndary, jergilikti turǵyndar men polısııa ókilderi qatysty.
- Birlesken jumys nátıjesinde 2020 jyly týǵan ul bala úıden 3 km qashyqtyqta taýly aımaqtan túnde tabyldy. Al 2015 jyly týǵan ápkesi Qotyr degen taýly aımaqtan 10 km jerden tańerteń tabyldy. Balalar dárigerlerdiń qaraýynan keıin ata-analaryna tabystaldy, - delingen habarlamada.