Almaty qalalyq kardıologııa ortalyǵynda elimizdiń ár shalǵaıynan kelgen mamandar júrekti fızıologııalyq yntalandyrý tehnologııasy (Conduction System Pacing) jóninde alǵashqy oqytý sheberlik dáristerinen óte bastady.
Jańa tehnologııalardy sátimen qoldanysqa engizýde QKO ıntervensııalyq arıtmologter tobynyń jetekshi eýropalyq emhanalarda tájirıbe baıytyp, oqý baǵdarlamasynan ótýi aıtarlyqtaı ról atqardy. О́ıtkeni mamandarymyzdyń alǵan bilimderi men tájirıbeleri kúndelikti jumysyna fızıologııalyq yntalandyrý ádisterin senimdi túrde engizýine jol ashyp otyr. Sonyń arqasynda qazirgi otandyq kardıologııalyq ortalyq sheteldik proktorlardy tartpaı-aq, sheberlik dáristeri men trenıngterin óz betinshe ótkizip júr. Bul otandyq arıtmologter kásibıliginiń joǵary deńgeıin, otandyq kardıologııalyq mekteptiń qalyptasyp kele jatqanyn aıǵaqtaıdy. Qazirde bilim berý isi QKO ıntervensııalyq arıtmologııa bóliminiń meńgerýshisi Artýr Ábdimomynovtyń jetekshiligimen «BIOTRONIK», «MEDCO» sııaqty kompanııalardyń qoldaýymen júrip jatyr.
Sheberlik dáristeri aıasynda júrek qurylǵylaryn ımplanttaýdyń zamanaýı ádisterin qoldana otyryp, eki demonstrasııalyq kórneki operasııalar jasaldy. Onyń biri aýyr sozylmaly júrek jetkiliksizdigi men júrekshe turaqty fıbrıllıasııasy bar 62 jastaǵy naýqasqa salynǵan kardıoverter-defıbrıllıator bolsa, ekinshi jaǵdaıda sınýs túıininiń álsizdik sındromy men ótpeli atrıoventrıkýlıarlyq blokadasy bar 59 jastaǵy naýqasqa eki kameraly elektrkardıostımýlıator (EKS) ımplanttaldy.
Eki operasııa da «Sonduction System Pacing» (CSP) tehnologııasy arqyly júzege asyryldy. Bul – elektrodtar tikeleı júrektiń ótkizgish júıesiniń qurylymdaryna (Gıs shoǵyry nemese shoǵyrdyń sol aıaqshasy) ornatylatyn ınnovasııalyq tásil. CSP-nyń dástúrli oń qarynsha kardıostımýlıasııasynan aıyrmashylyǵy, qarynshalardyń sınhrondy, fızıologııalyq belsendirilýin qamtamasyz etedi, múmkindiginshe tabıǵıǵa jaqyn.
Mamandardyń aıtýynsha, fızıologııalyq yntalandyrý mıokardtyń jıyrylý qyzmetin jaqsartýǵa, júrek jetkiliksizdigi belgilerin azaıtýǵa, aýrýhana tósegine tańylatyn kúnderdi kemitip, pasıentterdiń densaýlyǵyn durystaýǵa múmkindik beredi. Tipti keıbir jaǵdaılarda ol klassıkalyq kardıoresınhrondy terapııanyń (CRT) ornyn tolyq almastyra alady.
Osylaısha, árbir óńirden kelgen dárigerler arasyndaǵy ótken sheberlik dáristeri elimizde ozyq tájirıbeni taratý men arıtmologııalyq qyzmetti damytýda mańyzdy qadamǵa aınalyp otyr. Qalalyq kardıoortalyq bazasynda osy kúnge deıin 100-den astam operasııa jasaldy. Shetelderde tájirıbeden ótken dárigerlerimiz endigi kezekte bilimderi men mashyqtaryn aımaqtardaǵy mamandarǵa da erkin daryta bastady.
ALMATY