Elimizde «Batyrlarǵa taǵzym» atty portal úzdiksiz jumys istep tur. Onda Jeńiske ólsheýsiz úles qosqan otandastarymyzdyń erligi men jankeshtiligi týraly qundy aqparattar jınaqtalyp jatyr. Bir ereksheligi, veb-portalǵa kez kelgen paıdalanýshy óz týysqandary týraly derekterdi engize alady.
Ekinshi dúnıejúzilik soǵys qaharmandaryn ulyqtaýǵa arnalǵan biregeı bastama Ulttyq arhıvte ótken kórme barysynda kópshilikke tanystyryldy. Is-shara aıasynda portaldyń maqsaty men mindeti, onyń qurylymdyq erekshelikteri keńinen túsindirildi. Sondaı-aq qatysýshylar nazaryna saıtta jınaqtalǵan qujattar men maıdan dalasynan jazylǵan hattardyń túpnusqasy usynyldy. Arasynda soǵys ardagerleri Kárı Abıtov, Táńirbergen Qalılahanov, Hamıt Erǵalıev, Málik Ǵabdýllın jáne Ermekqalı Serikbaevqa qatysty tyń muraǵattyq materıaldar da bar.
– Saıtty ázirleý kezinde onyń qoljetimdiligi men qoldanýǵa yńǵaılylyǵyna erekshe mán berdik. Keıde basqa saıttarǵa kirseńiz, aldymen tirkelý kerek, sosyn túrli qosymsha suranystar, tipti nesıe usynystary shyǵyp ketedi. Biz ondaı qıyndyqtardy boldyrmaýǵa tyrystyq – saıt qarapaıym, túsinikti ári tez jumys isteıdi. Onda árbir paıdalanýshy ózine qajet aqparatty ońaı taba alady jáne qajet bolsa, ony tolyqtyryp, ózgeris engize alady. Bul ózgerister tekseristen ótken soń jarııalanady. Portalda ardagerdiń aty-jóni arqyly, poshta nemese áskerı komıssarıattan, sondaı-aq shaqyrylǵan ýaqytyna qaraı da izdeýge bolady. О́tinishterge arnalǵan Telegram botty da iske qostyq. Munda kún saıyn orta eseppen 100-150 anketa túsedi. Ony qaraıtyn saraptamalyq komıssııa bar. Olar kelip túsken málimetterdi muqııat qarap, aqparattyń durystyǵyn tekseredi, grammatıkalyq qatelerdi túzetedi. Sodan keıin ǵana ol málimetter saıtqa jarııalanady. Jalpy, bul joba – barsha otandyq ardagerlerge kórsetilgen qurmet ári bolashaq urpaqtyń jadynda tarıhı shyndyqtyń máńgi saqtalýyna jasalǵan mańyzdy qadam, – deıdi Ulttyq arhıv Arhıvtik tehnologııalar men sıfrlandyrý bóliminiń basshysy Aıdar Býlashev.
Veb-portal – Mádenıet jáne aqparat mınıstrliginiń jobasy. Saıtta ardagerlerge jáne jobaǵa qatysty jańalyqtar men oqıǵalar turaqty túrde jarııalanyp turady. Qazirdiń ózinde munda 678 myńnan asa soǵys ardageri, onyń ishinde 365 Keńes Odaǵynyń batyry, 4 eki márte Keńes Odaǵynyń batyry jáne 19 «Dańq» ordeniniń tolyq kavaleri jáne basqa da erjúrek jaýyngerler týraly keń kólemdi aqparat jınaqtalǵan.
Qujattyq kórmege soǵys ardagerleriniń ul-qyzdary, belgili qoǵam jáne memleket qaıratkerleri, zııaly qaýym ókilderi, stýdentter men oqýshylar qatysty. Is-sharanyń basty maqsaty – tarıhı data qarsańynda el taǵdyryn óz taǵdyrynan bıik qoıa bilgen, el tuǵyryn bıik etý jolynda erlikpen qaza tapqan batyr babalarymyzdyń qaharmandyqtaryna taǵzym etý ári olardyń esimin taǵy bir márte jańǵyrtý.
– Ulttyq arhıv qoryna ákemniń qujattaryn tapsyrdym. Muralardyń arasynda ákemniń ómir men ólim arasyndaǵy júrgen dápteri bar. Muny bala kezimizde kórgenimiz esimde. Latynsha jazylǵandyqtan oqı almadyq. Erteńgi urpaqqa mura bolsyn degen nıette, ákem qaıtys bolǵan soń jazbalaryn oqytyp, kitap retinde shyǵarǵanbyz. Jalpy, ár jańa býyn óz sanasynda, júreginde batyrlardyń esimin umytpaı, qadirleı bilýge tıis. Bul – bizdiń búgingi beıbit kúnimizge jol ashqan, táýelsiz elimizdiń irgesin qalaǵan erlerdiń aldynda boryshymyz. Olardyń erligi men janqııarlyǵy máńgi umytylmaýy úshin biz ony nasıhattap, keler urpaqqa jetkizýge mindettimiz, – deıdi soǵys ardageri Ánýarbek Súıindikovtiń balasy Qanat Súıindikov.