2025 jyldyń basynan bastap Astana men Almaty qalalarynda erekshe qajettilikteri bar azamattarǵa ınvataksı qyzmetin kórsetý boıynsha pılottyq joba iske qosyldy. Bul bastama QR Eńbek jáne halyqty áleýmettik qorǵaý mınıstrliginiń usynysymen júzege asyrylyp jatyr, dep habarlaıdy Egemen.kz.
Atalǵan joba sheńberinde jyl basynan beri elorda men Almatyda ınvataksı qyzmeti 138,1 myń ret kórsetilgen. Al 2024 jyldyń qorytyndysy boıynsha respýblıka kóleminde múgedektigi bar jandarǵa bul qyzmet 207,2 myń ret usynylǵan.
Mınıstrliktiń habarlaýynsha, Invataksı qyzmetiniń jyldamdyǵy men sapasyn arttyrý maqsatynda jergilikti ákimdiktermen birlesip, qyzmet kórsetý tetigine birqatar ózgeris engizý týraly sheshim qabyldaǵan. Buryn azamattar saparǵa bir kún buryn telefon arqyly jazylyp, kólik quraldarynyń jetispeýshiligine baılanysty uzaq kútýge májbúr bolatyn. Bul faktorlar erekshe qajettiligi bar adamdar úshin qolaısyzdyq týǵyzatyn.
«Osy máselelerdi sheshý jáne qyzmetti jeńildetý úshin Eńbekmıni ınvataksı qyzmetine taksı agregatorlaryn tartý jónindegi pılottyq jobany qolǵa aldy. Bul jobanyń basty sharty – taksı agregatorlary tarapynan sapar aqysynan komıssııalyq paıyz almaý. Bul talapty qoldaǵan Iаndeks kompanııasy pılottyq jobaǵa óteýsiz negizde qatysýǵa nıet bildirdi», delingen habarlamada.
Nátıjesinde, azamattar endi Iаndeks Go mobıldi qosymshasy arqyly Invataksı qyzmetin qoldana alady. Qosymsha arqyly kólikti jedel tańdap, tapsyrystyń mártebesin onlaın baqylap, saparlar boıynsha tolyq monıtorıng júrgizýge múmkindik bar. Sonymen qatar, qosymshada arnaıy múmkindikter ekrany iske qosylǵan. Ol arqyly múgedektigi bar azamattar sapar barysynda júrgizýshige ózderiniń erekshe qajettilikteri jaıly eskerte alady. Al júrgizýshilerge jolaýshyny kólikke otyrǵyzý jáne túsirý kezinde kómek kórsetýge arnalǵan arnaıy nusqaýlyqtar berilgen.
Aıta keteıik, bıyl Astana men Almaty qalalarynda joba pılottyq rejımde júzege asyp jatyr. Bul jumysqa erekshe qajettilikteri bar azamattar qatarynan qurylǵan fokýs-toptar da belsendi atsalysýda. Aldaǵy ýaqytta jobany elimizdiń ózge óńirlerine de kezeń-kezeńimen engizý josparlanyp otyr.