Prezıdent jyl basynda «Ana tili» gazetine bergen suhbatynda Jeńistiń 80 jyldyǵy aıasynda soǵys jáne tyl ardagerlerine aıryqsha qurmet kórsetiletini týraly aıtqan edi. Eńbek jáne halyqty áleýmettik qorǵaý mınıstrliginiń 8 mamyrdaǵy dereginshe, qazir elimizde 105 soǵys ardageri turady. Buǵan qosa fashızmdi jeńýge úles qosqan 40 707 adam bar. Prezıdent tapsyrmasy sheńberinde olardy áleýmettik turǵyda qoldaýdyń aýqymdy is-sharalary qolǵa alyndy.
Byltyr Jeńis kúnine oraı Ekinshi dúnıejúzilik soǵys qatysýshylaryna 1,5 mln teńge kóleminde birjolǵy materıaldyq kómek berilgen bolsa, bıyl Eńbek jáne halyqty áleýmettik qorǵaý mınıstrliginiń usynysymen onyń kólemi 5 mln teńgege deıin kóbeıdi. Jeńistiń 80 jyldyǵyn merekeleý aıasynda jyl basynan beri 109 ardagerge jalpy somasy 545 mln teńge kóleminde birjolǵy járdemaqy tólengen. Sonymen qatar Jeńiske úles qosqan ózge de sanattaǵy azamattarǵa 50 myńnan 200 myń teńgege deıin áleýmettik kómek berildi.
Eńbek jáne halyqty áleýmettik qorǵaý vıse-mınıstri Oljas Anafınniń aıtýynsha, ardagerlerge qamqorlyq jasaý, olardyń ómir súrý sapasyn arttyrý memlekettiń áleýmettik saıasatynyń basty basymdyqtarynyń biri bolyp sanalady.
– Elimizde qorshaýdaǵy Lenıngradtyń 64 turǵyny, konslagerlerdiń burynǵy kámeletke tolmaǵan 129 tutqyny, soǵys kezinde alǵan jaraqaty, kontýzııasy, zaqymdanýy nemese aýrýy saldarynan qaıtys bolǵan adamdardyń 1 638 jubaıy, sonymen qatar 38 874 tyl eńbekkeri bar. Bıyl 1 mamyrdaǵy jaǵdaı boıynsha soǵys ardagerleri alatyn áleýmettik tólemderdiń ortasha jıyntyq mólsheri 271 802 teńgeni, al tyl eńbekkerleri alatyn ortasha jıyntyq mólsheri 179 800 teńgeni quraıdy, – dedi ol.
Buǵan qosa vıse-mınıstr qazirgi kezde áskerı qyzmetshiler paıdalanatyn quqyqtar men kepildikterdiń barlyǵy ardagerlerimiz úshin de jaramdy ekenin aıtty. Olar salyq jeńildikterin paıdalanady, Astana jáne Almaty qalalaryndaǵy mamandandyrylǵan gospıtaldarda bilikti medısınalyq kómek kórsetiledi, sanatorıı-kýrorttyq emdeý usynylady.
Sondaı-aq jergilikti atqarýshy organdar bıýdjettik jáne demeýshilik qarajat esebinen ardagerlerge merekelik (ataýly) kúnderge oraı, turǵyn úıge jóndeý júrgizý, otynmen qamtamasyz etý úshin áleýmettik kómek túrinde qosymsha áleýmettik qoldaý sharalaryn, kommýnaldyq qyzmetterge aqy tóleý jáne qoǵamdyq kólikte jol júrý boıynsha jeńildikterdi, t.b. kómek túrlerin kórsetedi.
– 2025 jyly jergilikti bıýdjet qarajaty esebinen kommýnaldyq qyzmet aqylaryn óteý (2,6 mlrd teńge), turǵyn úıdi jóndeý (21,5 mln teńge), otyn satyp alý (14,5 mln teńge), qoǵamdyq kólikte jol júrý jeńildikteri (4,1 mlrd teńge), dári-dármekpen qamtamasyz etý (48,5 mln teńge), tis protezdeý (441,9 mln teńge), azyq-túlik toptamasy (103,9 mln teńge) túrinde kómek kórsetý kózdelgen, – deıdi Eńbek jáne halyqty áleýmetti qorǵaý vıse-mınıstri.
Buǵan qosa sáýir-mamyr aılarynda «Samruk-Kazyna Trust» áleýmettik jobalardy damytý qory «Salamatty Qazaqstan» mamandandyrylǵan poıyzyn iske qosyp, el halqyna profılaktıkalyq-dıagnostıkalyq qyzmet kórsetip jatyr. Joba sheńberinde Ekinshi dúnıejúzilik soǵys qatysýshylary, tyl eńbekkerleri jáne shalǵaıdaǵy stansalardyń turǵyndary bilikti medısına mamandarynan (terapevt, stomatolog, oftalmolog, otorınolarıngolog, hırýrg, ýrolog, mammolog, pedıatr) tegin tekserýden jáne emdelýden ótýge múmkindik alyp otyr. Onyń ishinde soǵys ardagerleri men olarǵa teńestirilgen adamdar úshin úıde qyzmet kórsetý kózdelgen.
Mádenıet jáne aqparat mınıstrligi men «Ardagerler uıymy» RQB ardagerler men tyl eńbekkerlerine kómek kórsetý boıynsha «Birgemiz Qamqor» respýblıkalyq jobasyn iske qospaq. Joba jastardy soǵys ardagerleri men tyl eńbekkerlerine degen tereń qurmet, gýmanızm men patrıotızm sezimderin oıatýǵa baǵyttalǵan.
Aıta ketsek, bizdiń elimizde TMD memleketteri ishinde soǵys ardagerlerine eń úlken áleýmettik qoldaý kórsetilip keledi. Bul kómek túrleri aldaǵy ýaqytta da jalǵasa bermek.