Búgin Almatyda ákimdiktiń qoldaýymen ardagerler birlestikteri uıymdastyrǵan «Batyrlarǵa taǵzym» atty estelik aksııasy ótti, dep jazady Egemen.kz.
Shara qala turǵyndaryn biriktirip, soǵysqa qatysqan batyrlarymyzǵa, tyl eńbekkerlerine jáne Jeńiske ólsheýsiz úles qosqan barlyq erjúrek azamattarǵa qurmet bildirýge arnaldy.
«Batyrlarǵa taǵzym» aksııasyna qatysýshylar sherýin áskerı úrmeli orkestr, Qurmet qaraýylynyń rotasy men ardagerler uıymdarynyń ókilderi bastap shyqty.
Ardagerlerdiń qoǵamdyq birlestikteri atynan aksııany uıymdastyrýshylardyń biri, Qazaqstan Respýblıkasy Generaldar keńesiniń tóraǵasy, general-leıtenant Sarsekov Beksultan urpaqtar sabaqtastyǵynyń mańyzdylyǵyna erekshe toqtaldy.
«Bárimizge belgili, bıyl Uly Otan soǵysyndaǵy Jeńistiń 80 jyldyǵy atalyp ótýde. Bul soǵysta Qazaqstan zor úles qosty. Maıdanǵa bir mıllıon eki júz myńnan astam jaýyngerimiz – atalarymyz, ákelerimiz attandy. Olardyń tek 600 myńy ǵana elge oraldy». Búgingi urpaq úshin azattyq pen jeńis jolynda, búgingi jarqyn ári táýelsiz Qazaqstanda ómir súrýimiz úshin janyn qıǵan erlerdi umytpaý – qasıetti paryz. Biz bul azamattardy árdaıym jadymyzda saqtaýymyz kerek», dedi ol.
Aksııa marshrýty Gogol kóshesiniń boıymen Ortalyq mádenıet jáne demalys parkinen bastap, 28 gvardııashy-panfılovshylar atyndaǵy saıabaqqa deıin jalǵasty. Shara Máńgilik alaý janyndaǵy Dańq memorıalyna gúl shoqtaryn qoıýmen aıaqtaldy. Shara barysynda orkestrdiń súıemeldeýimen áskerı áýender oryndaldy. Aksııaǵa 30 myńnan astam almatylyq qatysty.
Aksııaǵa qatysýshylardyń biri, almatylyq turǵyn – Gaýhar Júsipova, maıdanger bolǵan atasynyń portretin ustap kelip, onyń erlikke toly ómiri men otbasy jadyndaǵy tarıhymen bólisti.
«Meniń atam Tlepov Kalel Tlepuly 1914 jyly Semeı oblysyndaǵy Chalobaı aýylynda dúnıege kelgen. Soǵys bastalǵanda ol 39-tank brıgadasy quramynda, motorly avtomatshylar batalonynyń 1-rotasynda avtomatshy bolyp qyzmet etti. Onyń áskerı joly Sevastopolden bastalyp, Volgograd pen Dnepr arqyly ótip, 1945 jyly Býdapeshtke deıin jetti. Kórsetken erligi úshin babam «Erligi úshin» medalimen marapattalǵan.
Biz – bala-shaǵasy, nemere-shóbereleri, atamyzdyń erligin maqtan tutamyz. «Batyrlarǵa taǵzym» aksııasyna qatysý arqyly onyń rýhyna, sondaı-aq beıbit ómir syılaǵan barlyq ardagerlerge qurmetimizdi bildiremiz», dedi ardagerdiń nemeresi.
Kolonnalardy bezendirý barysynda 500 memlekettik tý qoldanylyp, qatysýshylarǵa 10 myń dana Qazaqstan týy men 20 myń «Jeńis lentasy» taratyldy. Is-sharany uıymdastyrýǵa 500 erikti jumyldyryldy. Jastardyń 14×7 metr kólemindegi alyp Memlekettik týdy kóterip ótýi aksııanyń jarqyn sátteriniń biri boldy.