Úrimshi qalasynda Qytaı Halyq Respýblıkasy men Ortalyq Azııa elderiniń bilim mınıstrleri, tıisti vedomstvolar men dıplomatııalyq korpýs ókilderiniń qatysýymen ótken keńeske QR Oqý-aǵartý mınıstri Ǵanı Beısembaev ta qatysty, dep habarlaıdy Egemen.kz.
Keńestiń basty maqsaty – bilim berý salasyndaǵy ıntegrasııa men ornyqty áriptestikti nyǵaıtý, aımaqtyq jáne halyqaralyq deńgeıde bilim berý sapasyn arttyrýǵa baǵyttalǵan ortaq bastamalardy talqylaý boldy.
Ǵanı Beısembaev óz sózinde aımaq elderi arasyndaǵy yntymaqtastyqty arttyrýdyń mańyzdylyǵyn atap ótip, ásirese tehnıkalyq jáne kásiptik bilim berý salasyndaǵy áriptestik baǵyttaryna basymdyq berdi.
«Qazaqstanda Memleket basshysy Qasym-Jomart Toqaevtyń bastamasymen 2025 jyl Jumysshy mamandyqtar jyly dep jarııalandy. Qazirgi ýaqytta tehnıkalyq jáne kásiptik bilim berý júıesinde aýqymdy ózgerister júzege asýda. Internasıonaldandyrý aıasynda álemniń jetekshi kolledjderi men óndiristik kásiporyndarymen seriktestik ornatylyp, bıznes qaýymdastyqpen yntymaqtastyq keńeıýde, pedagogter men stýdentter úshin akademııalyq utqyrlyq jetildirilýde. Qazaqstan yntymaqtastyqqa ashyq jáne jahandyq eńbek naryǵynda suranysqa ıe kadrlardy daıarlaýǵa baǵyttalǵan ortaq tásilderdi ázirleýdi qoldaıdy», dedi mınıstr.
Keńes qorytyndysynda qatysýshy elder Bilim mınıstrleriniń keńesi mehanızminiń Jarǵysyn jáne «Úrimshi deklarasııasyn» qabyldady. Bul qujattar memleketter arasyndaǵy bilim salasyndaǵy uzaq merzimdi áriptestiktiń quqyqtyq jáne ınstıtýsıonaldyq negizin qalyptastyrady. Sonymen qatar, joǵary bilikti mamandar daıarlaýǵa qatysty basym baǵyttardy bekitedi.
Aıta keteıik, kelesi mınıstrler keńesi Qazaqstanda ótedi. Rotasııa tártibine sáıkes, Ortalyq Azııa elderi men Qytaıdyń Bilim mınıstrleriniń ekinshi keńesin ótkizý quqyǵy men tóraǵalyq bizdiń elge berildi.