Almaty oblysy Talǵar aýdanyna qarasty Besaǵash aýylynda óńirdegi alǵashqy qos fýnksııaly tirek iske qosyldy.
Bul – bazalyq stansııa men kóshe shamynyń qyzmetin biriktiretin zamanaýı ınjenerlik sheshim. Bolashaqta mundaı qurylymdar beınebaqylaý júıesimen de jabdyqtalýy múmkin. Joba Huawei kompanııasynyń bastamasymen, Almaty oblysynyń sıfrlyq tehnologııalar basqarmasy men «KaR-Tel» JShS (Beeline saýda belgisi) arasyndaǵy ózara yntymaqtastyq týraly memorandým aıasynda júzege asyryldy.
Dástúrli antennalardan aıyrmashylyǵy — kólemdi ári kózge urmaıtyn bul tirek yqsham ári fýnksıonaldy dızaınmen erekshelenedi. Ol eldi mekenniń kelbetine úılesimdi enip, birneshe fýnksııany qatar atqarady: baılanys operatorlarynyń jabdyqtaryn ornalastyrýǵa múmkindik berip, kóshe jaryǵymen qamtamasyz etedi. Bul – aýyldyq jáne qalalyq ınfraqurylym úshin tıimdi sheshim.
Qos fýnksııaly tirektiń basty artyqshylyqtarynyń biri – ornatý merziminiń qysqalyǵy. Eger standartty baılanys munarasyn salý alty aıdan astam ýaqytty alsa, bul qurylym nebári bir aı ishinde ornatylady. Bul, ásirese, mobıldi baılanysty jaqsartý men beınebaqylaý júıesin engizý asa qajet óńirler úshin mańyzdy.
«KaR-Tel» JShS-niń tehnıkalyq dırektory Oleg Snımshıkovtyń aıtýynsha, bul jobanyń bolashaǵy zor: «Mundaı tirekterdi búkil Almaty oblysyna engizýdi josparlap otyrmyz. Bul, ásirese, aýyldyq jerlerde baılanys sapasyn arttyryp, óńirdiń sıfrlyq ınfraqurylymynyń mańyzdy bóligine aınalady», — dedi ol.
Qos fýnksııaly tirek tek baılanys úshin emes, qoǵamdyq keńistikterdi jaryqtandyrý arqyly túngi qaýipsizdikti qamtamasyz etedi. Aldaǵy ýaqytta mundaı qurylymdarǵa beınebaqylaý kameralaryn ornatý arqyly jergilikti bılik kóshelerdegi jaǵdaıdy baqylap, qoǵamdyq qaýipsizdikti arttyra alady. Osylaısha, tirek — aqyldy ári kópfýnksıonaldy qoǵamdyq keńistiktiń bir bóligine aınalady.
Aýyldyq jerlerde jeke ınfraqurylym tartýǵa múmkindik bola bermeıtin jaǵdaıda mundaı sheshimder asa ózekti. Keshendi tásil resýrstardy únemdeýge jáne zamanaýı tehnologııalardy eń qajet jerlerge engizýge septigin tıgizedi.
Huawei Technologies Kazakhstan kompanııasy atap ótti: «Biz árqashan tehnologııalardy adamdarǵa jaqyndatýǵa tyrysamyz. Kósheni jaryqtandyryp, baılanys sıgnalyn kúsheıtetin tirek – bul fýtýrızm emes, jaıly ári zamanaýı ómir súrý saltyna jasalǵan naqty qadam. Eń bastysy – bul qadam Besaǵash sekildi aýyldardan bastalýy biz úshin mańyzdy».
Qazirgi tańda osyndaı tirek Almaty qalasynda da ornatylyp jatyr — iske qosý mamyr aıyna josparlanǵan. Bul joba tek aýyldyq emes, megapolıs jaǵdaıynda da qoldanýǵa bolatynyn kórsetedi.
Sonymen qatar, bul pılottyq joba memleket pen bıznes arasyndaǵy jańa formattaǵy seriktestikke jol ashady. Mundaı bastamalar tehnologııalyq damýǵa ǵana emes, sonymen qatar jańa jumys oryndaryn qurýǵa, halyqtyń sıfrlyq saýattylyǵyn arttyrýǵa jáne jergilikti qaýymdastyqtardy damytýǵa yqpal etedi.
Besaǵash aýylyndaǵy joba – zamanaýı tehnologııalyq sheshimderdi jyldam, sapaly jáne qorshaǵan ortanyń estetıkasyn eskere otyryp iske asyrýǵa bolatyndyǵyn dáleldeıtin memlekettik jáne jeke sektordyń birlesken jumysynyń jarqyn mysaly.
Almaty oblysy.