Birlesken oqytý kýrsy bastaldy

Dáris barysynda ulttyq jáne halyqaralyq ekonomıka­daǵy negizgi reformalar taldandy. Sondaı-aq makroekonomıka­lyq saıasatty qaıta jańǵyrtý­ǵa arnalǵan saraptamalyq-zań­namalyq jumystyń basym mindetteri belgilendi.

Oqytý kýrsy Senat janyn­daǵy Taldaý mektebi men Sarap­shylar klýby aıasynda elimiz­degi sarapshylar qaýymdastyǵy­nyń analıtıkalyq qabilet­terin shyńdaý baǵytynda palata júrgizip kele jatqan jumystyń jalǵasy ekenin atap ótken jón. Tórt aptalyq kýrsqa 40 tyńdaýshy qatysady. Olardyń qatarynda Senat janyndaǵy Sarapshylar klýbynyń mú­sheleri men Taldaý mektebiniń túlekteri jáne monetarlyq saıa­sat taqyrybyna mamandanǵan jýrnalıster bar. Jobanyń bas­ty maqsaty – aqsha-nesıe saıasatyn jan-jaqty talqylaý arqy­ly ár saladaǵy analıtıkterdiń bul baǵyttaǵy sheshim qabyldaý úderisimen jaqyn tanysýyna jaǵdaı jasaý.

Alǵashqy dáris suranys pen usynys teorııasyna, naryqtyq tepe-teńdik pen ıkemdilikke jáne negizgi makroekonomıka­lyq kórsetkishterge arnaldy. Buǵan qosa is-sharada elimizdiń makroekonomıkalyq kór­set­kish­teriniń dınamıkasyna ret­ro­­spektıvti taldaý júrgizildi jáne jabyq ekonomıka modelderi men ozyq halyqaralyq tájirıbeler zerdelendi.

M.Áshimbaev atap ótkendeı, memlekettiń ekonomıkalyq saıasatynyń tıimdiligin arttyrýdy kózdeıtin mindetterdi nátıjeli iske asyrý jáne jahandyq ekonomıkalyq tártiptiń ózgerýi jaǵdaıynda jańa syn-qaterlerdi eńserý úshin taldamalyq daǵdylardy damytý aıryshqa mánge ıe. Sondyqtan atalǵan oqytý kýrsy tyńdaýshylarǵa qazirgi ekonomıkalyq ahýaldy tereń túsindirý jáne soǵan baılanysty kásibı turǵydan áreket etýine yqpal jasaý maqsatymen uıym­dastyrylyp otyr.

«Prezıdent Qasym-Jomart Toqaev aqsha-nesıe jáne fıs­kaldyq saıasat arasyn­daǵy teń­gerimsizdikterdi joıý kerek­tigin birneshe ret atap ótti. Bul baǵyttaǵy is-áreket­ter senimdi derekterge, tyńǵylyq­ty taldaýǵa jáne sapaly sarap­tamaǵa negizdelýi qajet. Osy rette jańadan qolǵa alynyp jatqan oqytý kýrsy Ulttyq bank sheshimderiniń qalaı qabyldanatynyn, olardyń ınflıa­sııaǵa, jumyspen qamtýǵa, ınves­tı­sııalarǵa, jınaqtar­ǵa jáne eldiń ekonomıkalyq ósýine qanshalyqty áser etetinin túsiný­ge, osy baǵytta tájirıbe jınaýǵa jaqsy múmkindik ekeni anyq», dep M.Áshimbaev jobany uıymdastyrǵany úshin Ulttyq bank komandasyna, sondaı-aq erikti negizde óz bilimderimen bólisýge daıyn bolǵan dáris­kerlerge alǵys bildirdi.

Oqytý kýrsynyń qory­tyn­dysynda tyńdaýshylar bazalyq mólsherlemeni belgi­leý­ge áser etetin analıtıka­lyq jumys týraly bilimin molaıtyp, negizgi makroekonomıka­lyq qatynastardy jáne artyq tehnıkalyq júktemesiz boljaý negizderin meńgeredi. Odan bólek, aqsha-nesıe saıasatynyń jalpy máni men mańyzy jóninde málimet alady.

Aıta keteıik, byltyr Par­la­ment Senaty Sıfr­lyq damý, ınnovasııalar jáne aero­ǵarysh ónerkásibi mı­nıstr­li­gimen birlesip, taldaý kezinde «úlken» derekter men jasandy ıntellektini qoldaný taqyry­byna arnalǵan semınar ótkizdi. Sonymen qatar buǵan deıin «Taldau Talks» podkastynda mo­net­arlyq jáne fıskaldyq saıasat­tyń ózekti máseleleri keńinen talqy­lanǵanyn atap ótken jón.